خلينا متفقين إن عملية البيع في الأساس قائمة علي نموذج أسمه
" العرض والطلب " وبيتم البيع من خلال مهارة مهمة جدآ إسمها الإقناع
وفي وقت الأزمات دايمآ بيحصل فى نموذج "العرض والطلب " فجوة أو خلل معين وده بيكون التفسير الحقيقي لمقولة " مصائب قوم عند قوم فوائد " والخلل ده بيكون بسبب عنصر المفاجأة خاصة فى الأزمات الغير متوقعة .
ومن الأسف فى وقت الأزمات بيكون فى عبء كبير على رجال البيع أنه يمارسوا الإقناع بشكل إحترافي وفى الغالب بيكون البقاء لمن يعتبروا العملاء هم أساس البيزنس.
علشان كده فى وقت الأزمات بيحصل حاجة من اثنين مالهومش ثالث
إما إن العرض بيزيد والطلب بيقل أو الطلب بيزيد والعرض بيقل 👌
وده بيكون مرهون بعدة عوامل مهمة جدآ أهمها :-
1️⃣ تغير سلوكيات العملاء الشرائية .
2️⃣ حجم وتوقيت الأزمة ونوعها .
3️⃣ مرونة أصحاب الأعمال وقدرتهم على استيعاب الأزمة وصبرهم.
4️⃣ الفرص اللى بتيجى مع الأزمة ومدي استعداد البيزنس للفرص دي.
5️⃣ نوعية المنتجات والخدمات إللى بتقدمها .
ومن هنا هنلاقي أن البيع يتأثر إما سلبآ أو ايجابيآ بالأزمات ولكن ....
هل نقدر نعوض البيع أو نتأخذ خطوات ممكن تقلل الخسائر أو تحول التحدي لفرصة نكسب منها على أرض الواقع .
الإجابة نعم طبعآ👌
خلينى أقولكم على قصة شركة إسمها هيدروجين كرافت شركة متخصصة فى صناعة الطائرات المسيرة والهدف من تصنيع الطائرات دي هو مراقبة أنشطة التلوث وحماية الغابات .
طبعا بيزنس زى ده مع أزمة كورونا الطلب على المنتجات بتاعته قل جدآ فى ظل أن العرض كان كبير جدآ والفجوة دى بين العرض والطلب خلت الشركة خسرت مبيعات كتيرة جدآ جدآ
وده السبب إللى خلى صاحب الشركة يبدأ يفكر فى أفكار إبداعية يعوض بها الخسائر دى وفكر بشكل مختلف وقدر يقنع الحكومة الصينية أنهم يستخدموا الطائرات الخاصة بشركته فى مراقبة الحجر الصحي وفي رش وسائل التعقيم فى الجو وإطلاق أشعة فوق بنفسجية لتطهير المطارات ومحطات القطار والمنازل ..... الخ .
وبكده قدر إنه يعوض نقص الطلب وحقق جزء من التوازن من خلال خلق ميزة تنافسية جديدة للمنتج بتاعه واستخدام جديد للمنتج يتناسب مع الأزمة الحالية .
ومن هنا هنلاقي أن فى وقت الأزمات مش مطلوب منك غير إنك تكون هادئ جدآ وتفكر فى مجموعة عوامل مهمه جدآ أهمها
✍ايه الإستخدامات الأخري للمنتج بتاعك وعلاقتها بالأزمة دى.
✍ايه المنتج الجديد إللى ينفع إنك تضيفه عندك ويكون مرتبط بحل مشكله عند العملاء فى وقت هذه الأزمة.
✍ايه أهم التغييرات إللى حصلت فى سلوك العميل الشرائي وازاى تقدر تستثمرها بشكل يفيد البيزنس.
✍ايه هي المنتجات الحالية إللى ينفع تطورها بحيث أنها تساهم فى حل مشكله عند العميل فى وقت الأزمة.
وهنا يبقي السؤال المهم جدآ
👈 إيه تانى ممكن يحد من تأثير الأزمات على المبيعات ؟!
شاركونا بأرائكم فى التعليقات واتمنى يكون الموضوع فيه إفادة لكم
تحياتى
كريم محسن
تقدرو تتابعونا أسرع على قناة التليجرام Telegram
0 تعليقات