العربية إللى حيلتي باظت
من حوالي 10 أيام بدأت العربية فى اصدار أصوات غريبة لما بدوس بنزين.
ده طبعآ غير صوت الموتور إللى بقي عالي زيادة عن اللزوم، ولقيت كمان لون زيت الفتيس محروق جدآ، على الرغم من اني مهتم بصيانة العربية بإستمرار.
كل المشاكل دي كانت مسببة ليا إزعاج كبير جدآ وبدأت رحلة البحث عن الحل وكأني بدور على إبرة فى كوم من القش، ولأني مش بحب استعجل فى قراراتي بدأت أروح أكثر من ورشة وأكثر من صنايعي علشان اكتشف السبب وراء كل هذه المشاكل، ومع الأسف كان كل واحد يقولي حاجة مختلفة عن التانى، وسمعت ارقام مبالغ فيها جدآ لإصلاح العربية ده طبعآ غير إن أغلبهم محدش كلف خاطره اصلآ وجرب العربية ومشي بها خطوتين.
ده طبعآ خلاني أكون متردد فى إنى آخد قرار بالإصلاح عند أى حد منهم لأن مفيش ولا واحد فيهم كان واضح ومحدد في نقل المعلومة وذكر تفاصيل الإصلاح كاملة، وكانوا بيكتفوا فقط أنهم يقولوا سعر التكلفة وبس، إزاى بقي وليه وهيعملوا إيه مش مهم بالنسبة لهم
لحد ما ربنا كرمني بورشة غيرت وجهة نظري تمامآ عن الصنايعية والورشة كانت ترشيح من حد وبالفعل سمعت برأيه وروحت الورشة.
قابلت هناك مهندس إسمه جمال أول ما قابلني لقيت تعامله مختلف تمامآ عن جميع الورش إللى زرتها.
المهم سمع مني المشكلة كاملة وقالي تعالي نطلع مع بعض كده بالعربية لأنى عايز أسمع الأصوات دي، وبالفعل ركب العربية وقعدنا أكثر من نصف ساعة بنجرب العربية، ورجعنا تانى الورشة وطلب لى قهوة وفتح كبوت العربية وشيك عليها.
بعد كده قعد جانبي قالى بص حضرتك الأصوات دى نتيجة حاجة إسمها قربة الفتيس وحاجة إسمها بلي العجل ولكن علشان أكون صريح مع حضرتك الفتيس ده عامل زى البطيخة ممكن نفتح الفتيس نلاقي فى مشاكل تانية وممكن نكتفي بس بقربة الفتيس ونغير بلي العجل وبعد كده الأمور هتكون تمام.
رديت عليه طيب يابشمهندس التكلفة هتكون كام وهتاخد كام يوم
قالي بص قربة الفتيس دي بتكون فى حدود 2300 : 2500 ولكن مع الأسف هي ناقصة لو حضرتك عايز اجيبها تمام ولو حضرتك تجيبها وانا اركبها برضوا تمام وبلي العجل فى حدود 250 : 300 وبالنسبة للمواعيد انا مش هقدر اشتغل فى العربية دى إلا يوم الإثنين وهتاخد أسبوع بالكثير.
المهم مشيت من عنده وقلت أسأل على قطع الغيار دي علشان احدد إذا كنت هجيبها ولا اخليه هو يجيبها، ولقيت أن الأسعار إللى قالي عليها تقريبآ أقل من سعر السوق ب 100 : 150 ج، ولقيت كمان أن قربة الفتيس دى فعلا ناقصة.
ده طبعآ غير إن أكثر من حد من بتوع قطع الغيار أكد لى أن مصدر الاصوات دى قربة الفتيس وبلي العجل والموضوع ممكن يؤثر على الفتيس بالكامل بعد كده نفس كلام المهندس جمال بالظبط.
هنا بالفعل روحت وديت العربية للمهندس جمال وخليته هو يشتغل فيها ويجيب قطع الغيار، وقبل ما أمشي قلت له ياريت ماتتأخرش عن اسبوع لأنى محتاج العربية جدآ، ومش هينفع اتحرك من غيرها الفترة دي.
المهم قبل ما يمر أسبوع لقيت إتصال منه بعد 4 أيام بالظبط بيقولى حضرتك تقدر تيجي تستلم العربية ومش عايز أقول إنى والله اشتريت فتيس كامل علشان اجيب لحضرتك قربة الفتيس منه لأنى عارف إنك مستعجل على العربية ومش حابب إني أتأخر عليك.
روحت استلمت العربية والحمد لله العربية اتصلحت وكل المشاكل إللى بتعاني منها اختفت تمامآ لدرجة إنى كنت مش مصدق إنه قدر يصلح الاعطال دى في 4 أيام بس، ومش بس كده ده كل حاجة عملها في العربية وضحها ليا بالورقة والقلم ولقيته واخد العربية فى المغسلة بيغسلها كمان.
المهندس جمال قدر إنه يرفع درجة الوعي عندي بخدماتة وبالأعطال إللى كانت موجودة عندي فى العربية لدرجة إنى عملت ريفيو إيجابي عنه فى صورة فيديو لأنه فعلا #رجل_بيع_مختلف جدآ وأمين ومعندوش أى مشكلة إنه يفهم العميل ويوضح له كل شئ بمنتهي الأمانة والمصداقية ولا يتهاون في رفع درجة وعي عملائه بأعمال العربية وطرق إصلاحها، وبكده هو قدر أن يحول #القيمة_المدركة بالنسبة له إلي قيمة مدركة بالنسبة لي.
علشان كده دايمآ بقول لكل #رجال_البيع إن قدرتك على #رفع_درجة_وعي_عملائك بالمنتجات والخدمات إللى بتقدمها والصناعة والمجال بتاعك هي إللى بتمكنك من إنك تكون الخيار الأول بالنسبة لهم، وهي إللى بتخليك تقدر تحقق مبيعات كبيرة جدآ على المدي البعيد.
أوعي تتهاون فى رفع درجة وعي العميل، وخليك واضح وأمين فى نقل المعلومة التى تخص مجالك.
وهنا خلينى أقولك أن العميل بيكون عنده ولاء تام لأول كيان بيرفع درجة وعيه بالمنتج وبيعتبره مصدر ثقة كبيرة بالنسبة له، ومش بس كده ده بيرشحه لأى حد وكأنه تحول من عميل خارجي فقط إلى عميل مسوق لك ولمنتجاتك.
#عميلك_هو_مصدر_رزقك بعد الله سبحانه وتعالي فعامله كما تحب أن تعامل، ولو عايز فعليآ إنك تستفيد منه وتخليه يشتري منك أكثر من مرة وتكون بالنسبة الخيار الأول مش مطلوب منك غير إنك تركز وتشتغل علي إنك إزاى تقدر تساعده وتفيده وتخلق الوعي والإدراك عنده بكل حاجة أنت بتقديمها له.
وبكده هتكون لك الريادة فى مجالك وتكسب ثقة عملائك إللى ثمنها بيساوي فلوس كتير مش هتقدر تحققها إلا ب #تثقيف_عميلك.
وهنا يبقي السؤال
هل تري أن إهتمام الشركات والبرندات بتثقيف العميل ورفع درجة وعيه لها أثر على تحقيق المبيعات مع ذكر مثال من واقع تجربتك ؟
تحياتى
كريم محسن
=================================================
احنا موجودين في كل المنصات عشان نوصلكم المعلومة اللي تفديكم في شغلكم او الابتسامة اللي بتساعدنا في مواجهة الظروف الصعبة او يارب يجعلنا سبب في انك تلاقي وظيفة
مستنينكم
***********************
***********************
0 تعليقات