في ناس كتير نفسها تبنى #البراند_الشخصي الخاص بها ولكن المشكلة إنهم بيكونوا مش عارفين الطريق، واللى عارف منهم الطريق بيكون مش عارف الخطوات الصحيحة إللى يمشي عليها أو بيمشي على سطر ويسيب سطر.
في البوست بتاع النهاردة جاى أقولك #إزاى_تبني_البراند_الشخصي بتاعك في مجموعة من النقاط إللى هتسهل عليك إنك تتحول إلى براند بدون تعقيد وبأبسط صورة ممكنة وتقدر من خلالها إنك تبيع صح لعملائك أو جمهورك
خلينا في البداية كده نعرف أهم ما يميز أي براند حقيقي موجود حوالينا سواء البراند ده بيقدم منتج أو خدمة أو فكرة هي قيمة ما يقدم هذا البراند للعميل.
وهنا إحنا بنتكلم عن شئ في التسويق إسمه #القيمة_المدركة كل ما كان عندك قيمة حقيقية مدركة لعملائك كل ما كنت قادر على #بناء_براند شخصي ناجح وحقيقي مبني على أسس سليمة، وده لأن غياب القيمة دي وعدم وجودها أو عدم إدراكها للعملاء بيساوي إنك تكون زيك زي غيرك وده عمره ما هيبني براند لأن مفيش قيمة حقيقة ملموسة بتقدمها وهنا المنافسة بتكون شرسة جدآ والبقاء للشخص إللى بيقدم سعر أقل فقط.
علشان كده لازم نفهم إن بناء البراند الشخصي له أسس وقواعد إذا تم تجاهلها مع الأسف مش هتقدر توصل لشئ واضح، ونفهم كمان إن البراند عبارة عن عملية بيع متكاملة مبنية على أسس تسويقية سليمة وعمليات تسويقية متكاملة يعني ما ينفعش نمشي في بناء البراند على سطر ونسيب سطر.
طيب ايه الخطوات إللى من خلالها تقدر تبني البراند الشخصي بتاعك ؟
1️⃣ أنت مين :- في بداية بناء البراند بتاعك الجمهور بيكون عايز يعرف أنت مين والمقصود بأنت مين ؟! كل شئ بيشكل هويتك زى تخصصك مجال عملك وخبراتك والمهارات التى تمتلكها وقصتك والخطوة دي بتكون عبارة عن خطوة التعارف الحقيقي إللى من خلالها بتقول للناس أنت مين وتقدر تعمل إيه ومن خلالها يتشكل لدي جمهورك الوعي بالبراند بتاعك.
2️⃣ بتبيع إيه :- بعد ما تعرف الجمهور عليك بيكون جه دور أنهم يعرفوا إيه هي المنتجات أو الخدمات أو الأفكار إللى بتقدمها ولما بنتكلم عن الجزئية دى بيكون الهدف إنك تعرفهم على الفائدة إللى هتعود عليهم من هذه المنتجات أو الخدمات وتجاوب لهم على سؤال مهم جدآ.....وهو ليه يتعاملوا معاك أنت بالذات مش مع غيرك وكل ما زاد وعيك وإدراكك بقيمة الشئ إللى بتقدمه كل ما قدرت تتغلب على عقبات كتير جدآ مش ممكن تقدر تتغلب عليها إلا بمعرفتك الحقيقية بالمنتجات والخدمات أو الأفكار بتاعك وأهميتها لعملائك.
3️⃣ بتبيع فين :- هنا بيكون جه دور إنك تعرف الجمهور على كيفية حصولهم على الشئ إللى بتقدمه فين ممكن يلاقوا الشئ ده أو ما يسمي #بقنوات_التوزيع على سبيل المثال لو حضرتك مدرس لغة عربية الجمهور بتاعك لازم يعرف فين يقدر يحجز مع حضرتك حصص أو كورسات اللغه العربية لو حضرتك بتقدم خدماتك مثلآ في مكان معين أو عبر منصة إلكترونية معينة وهكذا....وهنا أنت لازم تراعي أن المكان ده يكون سهل الوصول إليه وغير معقد في العمليات بتاعته ويراعي فيه المستويات الثقافية المختلفة للجمهور بتاعك.
4️⃣ بتبيع إزاي :- خلينا برضوا على نفس المثال لو حضرتك مدرس لغة عربية ايه هي الطريقة إللى الجمهور بتاعك يقدر يدفع بها مقابل ما تقدم من خدمات يعنى مثلا إشتراك شهري ولا بالحصة ولا بالترم وهل الطريقة دي مناسبة للجمهور بتاعك وقدراتهم الشرائية ولا محتاج تطورها زى طرق الدفع الإلكتروني أو الدفع بالفيزا أو بأنظمة التقسيط وهنا لابد إنك تراعي إن طرق الدفع دي تكون متعددة حتى تناسب أكبر عدد ممكن من جمهورك خاصة لو عملائك من بلاد مختلفة.
5️⃣ بتبيع امتي :- هنا بيكون مطلوب من حضرتك تحدد الأوقات والمواسم والمناسبات إللى ممكن ينشط فيها البراند بتاعك ولما بنقول تحديد يعنى تكون مكتوبة ومحددة بعناية ومن خلال التحديد ده انت بتقدر إنك توجه مجهودك ووقتك وفلوسك في المكان الصح وفي الوقت والزمان الصح وبكده تكون احتمالية تحقيق النتائج بتكون تكبر بكتير من عدم التحقيق.
6️⃣ بتبيع لمين :- كل النقاط السابقة ليس لها أى قيمة إذا لم تكن تعلم بتبيع لمين مين هو جمهورك المستهدف أو المحتمل إيه هي مواصفاته وأماكن تواجده ومستوى دخله وخبراته.....وكل ما قدرت إنك تجمع معلومات عن جمهورك كل ما قدرت إنك تؤثر فيهم أكثر وأكثر وقدرت انك تلبي احتياجاتهم بشكل مناسب يشجعهم على التعامل معك دون غيرك ( ذاكر عميلك لأنه مصدر رزقك بعد الله سبحانه وتعالي )
وبكده نكون وضحنا أهم النقاط إللى لازم تاخد بالك منها في بناء البراند الشخصي بتاعك وبمجرد ما تعرف تجاوب على هذه النقاط سوف تتضح لك الرؤية بشكل كامل وهتعرف أن بناء البراند بيبدأ من وعي العميل بكل شئ بتقدمه
أتمنى أكون قدرت اوضح لكم لو جزء صغير من معلومة وفي الختام اكتبولي في التعليقات ايه هي الموضوعات إللى حابين نتكلم فيها في البوستات القادمة؟
تحياتى
كريم محسن
=================================================
احنا موجودين في كل المنصات عشان نوصلكم المعلومة اللي تفديكم في شغلكم او الابتسامة اللي بتساعدنا في مواجهة الظروف الصعبة او يارب يجعلنا سبب في انك تلاقي وظيفة
مستنينكم
***********************
***********************
0 تعليقات