ياعم أنت بتقول إيه بس إزاى التوفير خسرك كتير ؟
من أحد أهم العوامل إللى ممكن بسببها تخسر كتير إنك تكون عايز توفر في كل حاجه فى البيزنس بتاعك على حساب #جودة_المنتج أو الخدمات إللى بتقدمها لأنك بكده هتكون بتحفر لنفسك حفرة كبيرة جدآ صعب الخروج منها.
في عام 2015 جالي أحد العملاء وطلب مني أساعده في بناء وإعادة هيكلة البيزنس بتاعه وده كان بسبب انخفاض كبير في مبيعات شركته
وقتها طلبت منه مجموعة من المعطيات والبيانات إللى من خلالها بنقدر نعرف الوضع الراهن للبيزنس وبعد تحليل كل البيانات دى وبعد زيارات كتيرة ولقاءات أكتر مع العديد من العاملين معه ومع العديد من عملائه إكتشفت إن أحد أهم الأسباب لإنخفاض مبيعات الشركة بشكل كبير هو اللجوء إلي #سياسة_التوفير الغير مدروسة مما أدي إلي خسارة عدد كبير من العملاء في وقت قياسي.
وهنا كانت الصدمة الكبري إن العميل وقتها مش عايز يعترف أن ده السبب الجذري لخسارة المبيعات وبقي في بيننا خلاف بسيط وده خلاني أعتذر عن إستمرار العمل بيننا.
وبعد مرور أكثر من 3 أعوام جالي إتصال منه بيقولي بجد أنا مش عارف أقولك إيه ياريتنى كنت سمعت كلامك مكنتش وصلت للمرحلة دى لان فعلا #التوفير_خسرنا_كتير لدرجة إن كل جنيه كنا بنوفره فى الخامات بتاعة المنتجات أو بنوفره في نوعية الموظف إللى بيتعين معانا كنا بنخسر امامه ما لا يقل عن 20 ج، وده كله لأنى سمعت كلام ناس الله يسامحهم بسببهم خسرت العملاء بتوعي وخسرت مجموعة متميزة من الموظفين الأكفاء.
علشان كده دائمآ ما أقول لكل عملائي #التوفير_سلاح_ذو_حدين ممكن يخسرك وممكن يكسبك وده كله بيتوقف علي الحاجه إللى أنت بتوفر فيها.
مينفعش خالص إنك تقرب من جودة المنتج أو الخدمة إللى بتقدمها خاصة لو عملائك إعتادوا على أنك بتقدم شئ فيه جودة لأنك بمجرد بس ما تبدأ في التوفير على حساب الجودة مع الأسف مبيعاتك هتخس النص ويمكن أكتر كمان وكل يوم هيعدي عليك هتفقد فيه عملاء كانوا فعلا عندهم ولاء لك ولمنتجاتك وخدماتك.
طيب السؤال المهم دلوقتي إيه هي الحاجات إللى مينفعش نوفر فيها في البيزنس بتاعنا ؟
مينفعش توفر في جودة المنتج أو الخدمة تحت أى ظرف خاصة لو الجودة دى #ميزة_تنافسية_متفردة بالنسبة لك 
مينفعش توفر في جودة الموظفين تحت مسمي #تقليل_المصروفات لأنك بكده هتخسر الموظفين الأكفاء عندك ومحدش هيفضل موجود عندك إلا الموظفين اللى مهاراتهم ضعيفة.
مينفعش توفر في الأوراق النظامية إللى من خلالها يكون البيزنس بتاعك ماشي بشكل نظامي وقانوني على إعتقاد منك ان محدش ماشي عدل وده ممكن يزود إحتمالية خسارة البيزنس في أى لحظه.
مينفعش توفر في السيستم إللى أنت شغال به لأنه يعتبر من أهم الأدوات إللى بتخليك تقلل الخسائر وتمنع خسائر كتير ممكن تحصل لك لو معندكش سيستم من الأساس أو بتعتمد على سيستم ضعيف غير مكتمل الأركان. وبعد ما تعرفنا على أهم الحاجات إللى مينفعش توفر فيها تحت أى ظرف من الظروف لازم نعرف إن #التوفير_الغير_مدروس قد يكون في ظاهره توفير فلوس ولكن على المدي البعيد كل إللى وفرته هتدفع أضعافه وأكتر علشان تعرف تلاحق على الخسائر.
وقتها مش هتعرف لأن تكلفة الإصلاح هتكون أكبر بكتير من أى حاجة وفرتها ومش هيكون أمامك إلا إنك تسلك طريق الإصلاح إللى هيكون صعب عليك جدا ومحتاج منك وقت ومجهود وفلوس كتير علشان بس تحاول ترجع ثقة عملائك فيك.
مهم جدا إنك تكون عارف كويس أوى الكلام ده لأنك لو مش عارفه سهل إنك تقع في فخ التوفير إللى ممكن يخسرك كتير
وفي الختام :-
ما هي الأشياء التى وفرت فيها واكتشفت بعد كده انها سببت لك خسائر في المستقبل ؟؟
شاركونا تجاربكم في التعليقات
تحياتى
صفحة كريم محسن
=================================================
احنا موجودين في كل المنصات عشان نوصلكم المعلومة اللي تفديكم في شغلكم او الابتسامة اللي بتساعدنا في مواجهة الظروف الصعبة او يارب يجعلنا سبب في انك تلاقي وظيفة
مستنينكم
***********************
***********************
0 تعليقات