ليه عندك إصرار إنك تأذي نفسك، ليه دايمآ بتسمح لنفسك إنك تكون نقطة فى تحقيق أهداف غيرك من الأشخاص الغلط الموجودين فى حياتك .
من أسوأ ممارسات #الأذى_الذاتي إنك تكون دايمآ #تحت_الطلب وطلبات الناس كلها بالنسبة لك مجابة بدون وعي منك أو حتي فرز للناس دي وده بيخليك بتخدم الناس الغلط وبتضيع الفرصة على ناس تانية أولى بأهتمامك.
مش عيب إنك تكون خدوم وبتحب تخدم الناس وتقدم لهم يد العون ولكن العيب إنك تكون بتخدم الناس الغلط ومش بتعرف توجه وقتك ومجهودك بالشكل السليم وده دايمآ بيخليك مش بتعرف تقول لا للناس دى إللى بيكون كل هدفهم أنهم يستخدموك لتحقيق أهدافهم بدون إعطاءك أبسط حقوقك سواء معنويآ أو ماديآ .
" طيب نعمل إيه علشان نعرف نوجه وقتنا ومجهودنا مع الناس الصح "
علشان تعرف توجه مجهودك ووقتك مع #الناس_الصح يبقي أنت مش محتاج أكثر من إنك تعرف تقول لا ......
تتعلم إمتى تعتذر عن عمل شئ معين وتتعلم إنك ما تجيش على نفسك وتقول لاء لأى علاقة بتأذيك لأى حد بيحاول يستغل الجانب الإنساني فيك لأنك بمنتهى البساطة عندك الحق إنك تمنح وقتك ومجهودك لمستحقيه.
الإعتذار عن أى عمل بيسبب لك إزعاج أو أى عمل مش مناسب ليك وده يعتبر أبسط حقوقك ولو الشخص إللى بتتعامل معاه مش متقبل رفضك لازم تكون عارف إن دى مشكلته هو وأنت ملكش دخل فيها.
" طيب وهستفيد إيه لما أقول للناس دى لاء "
كلمه لاء فى حد ذاتها مع كل إنسان بيستغلك أو مع أى علاقة بتنعكس سلبآ عليك هتخليك أنت الوحيد المتحكم فى حياتك وهتزيد من ثقتك فى نفسك وفى قراراتك ومش بس كده ده كمان هتوفر عليك وقت ومجهود كبير كان بيضيع مع الأشخاص الغلط لمجرد إنك بتنحرج وكمان هتحافظ على ما يسمي ب #مساحتك_الشخصية وده سينعكس بالتأكيد على صحتك النفسية بالإيجاب .
وهنا لازم تكون عارف إن الإحراج من إنك تقول لاء وإستمرارك على تلبية أى شئ لأى حد وفي أى وقت هيتحول فى يوم من الأيام إلى حق مكتسب وهتلاقي نفسك مضطر إنك تقول نعم حتى لو كان إللى مطلوب منك مش مسئول منك ومع الأسف هتلاقي نفسك بتحاسب على المشاريب وأنت أصلا ما شربتش حاجه 
" لحد هنا كويس طيب إزاى بقي أقول لاء بدون إحراج "........
الموضوع بسيط جدا " أعتذر بشياكة " وعلشان تعرف تعمل ده هقولك دلوقتى على ثلاثة قواعد ممكن تتبعهم علشان تعرف #تعتذر_بشياكة :-
أتبع قاعدة الوقت مش مناسب ( بعتذر منك مش هقدر أساعدك فى الوقت ده. 
أتبع طريقة المماطلة فى الوقت ( معنديش مشكله إنى أساعدك بس المهمه دى ممكن تأخد منى وقت أد كذا .
أتبع طريقة النصيحة ( أنا يسعدني إنى أساعدك ولكن فى شخص آخر أفضل مني ممكن يقوم بالمهمة دى بحكم أنها من إختصاصه.وبكده هتكون قدرت إنك تتخلص من #الأذي_الذاتي إللى بتسببه لنفسك لمجرد إنك #تحت_الطلب فى أى وقت ولأى حد وهتكون عرفت إمتي تقول لاء وإزاى تقولها كمان .
تحياتي
كريم محسن
=================================================
احنا موجودين في كل المنصات عشان نوصلكم المعلومة اللي تفديكم في شغلكم او الابتسامة اللي بتساعدنا في مواجهة الظروف الصعبة او يارب يجعلنا سبب في انك تلاقي وظيفة
مستنينكم
***********************
***********************
0 تعليقات