النهاردة هقولكم على سر من أسرار المدير الناجح ويعتبر السر ده سبب رئيسي فى تحقيق المدير للمزيد من النجاحات والنتائج وانه يكون ذو أثر إيجابي في حياة الآخرين.
السر ده عبارة عن صفة مهمة جدآ لابد أن يتمتع بها كل مدير يبحث عن التميز في إدارته ويقدر من خلال الصفة دى إنه يجني المزيد والمزيد من النتائج المبهرة، الصفة دى هي التجرد
أى مدير علشان ينجح لازم يكون عنده موارد تساعده إنه ينجح، ومن أعظم هذه الموارد، المورد البشري إللى من خلاله بيقدر كل مدير إنه ينجز ويحقق النتائج المطلوبة منه.
علشان كده لازم كل مدير يفهم أن الناس بتنجح بالناس محدش بينجح لوحده وعلشان القاعدة دى تجني ثمارها لازم المدير يكون متجرد من مصالحه الشخصية لأجل تحقيق المصلحة العامة للكيان إللى شغال فيه بما يضمن تحقيق المصلحة العامة لفريق عمله.
التجرد إنك تكون مدير عندك الوعي والإدراك الحقيقي إن فريق عملك من أهم الأدوات إللى من خلالها تقدر تحقق المطلوب منك بكل كفاءة وفعالية ولو الفريق ده مش حاسس إن حقه معاك مش هيضيع عمره ما هينجز أكثر في وقت أقل.
علشان كده التجرد من تحقيق مصالحك الشخصية وإنك تكون مدير دماغك كبيرة وفاهم إن نجاح فريق عملك هو في الأساس نجاح حقيقي وبرهان لحسن إدارتك هو السبيل لتحقيق ذاتك والاستمرار على النجاح إللى يعتبر أهم بكتير من النجاح نفسه.
جرب كده تنسب أى نجاح أنت حققته لفريق عملك وشوف النتائج هتلاقي إنك كنت فاهم الإدارة غلط وبسبب عدم تمتعك بصفة التجرد ضيعت فرص كتير أوى منك.
الخلاصة لو عايز تنجح ساعد غيرك إنه ينجح وقدم الدعم والمساندة لفريق عملك وأحترم خطواتهم حتى لو كانت صغيرة وإشعرهم بأهمية دورهم حتى لو كان بسيط وانسب النجاح لهم حتى لو كان النجاح ده خطوة صغيرة فى طريق تحقيق أهدافك وقتها بس هتحس بنتائج عظيمة جدآ مش ممكن تحققها إلا من خلال التجرد من المصلحة الشخصية لأجل تحقيق المصالح العامة إللى من خلال تحقيقها بس هتقدر تحقق ذاتك فى وظيفتك كمدير.
وفي الختام إلى أى مدي تري أن هذه الصفة لها تأثير إيجابي في تحقيق أهدافك كمدير ؟
بإنتظار آرائكم فى التعليقات
تحياتي
كريم محسن
https://www.facebook.com/KarimMohsenConsulting/
=================================================
0 تعليقات