جاء لي سؤال بيقول انا شغال في #مجال_البيع وبسبب الضغط الكبير فى المجال ده مع الأسف بشرب سجائر بشكل مبالغ فيه ومش عارف ابطل تدخين، لأن كل يوم فى ضغط فى الشغلانة كتير جدآ
لو عند حضرتك تجربة أو خطوات تقدر تفيدني بها يبقي جزاك الله خير
الإجابة 👇
حضرتك عامل زى الواحد اللى عايز يخس زى ما في فى ناس كتير بتحاول إنها تخس، ولكن مع الأسف مش بتقدر تنزل وزنها، ولا بتقدر تسد بوقها، وبمجرد إنها تحاول تنزل وزنها وتنظم طريقة أكلها مش بتكمل، وبترجع تزيد أكتر من الاول .
وفي ناس كتير بتبقى عارفة أن التدخين مضر للصحة ومع الاسف مش بتاخد خطوة إنها تبطل تدخين ومش بتقدر إنها تبطل ويوم ما بتحاول تبطل بتلف تلف وترجع تانى تدخن أكتر من الاول ودايمآ الناس دي بتدي لنفسها مبرر للتدخين زى ما حضرتك بتقول.
وهنا حل الموضوع ده يبدأ من الوعي ومعرفة السبب إللي بيخلينا مش بنعرف ناخد خطوة واحدة تجاه الحاجات إللى عايزين نوصل لها
السبب بمنتهى البساطة هو يسمي ب #قوة_العادات وتحول هذا التغيير المطلوب من مرحلة إنه مجرد فكرة إلي مرحلة الفعل وإتخاذ خطوات للتنفيذ.
وده اللى بيخلي العادات القديمة المتأصلة دى بتحارب أى حاجة جديدة علشان تحافظ على بقائها.
طيب يعنى إيه قوة العادات ؟؟
لما بتبقي عايش بقالك فترة كبيرة بتعمل نفس الحاجة كل يوم بتتحول إلى عادة وروتين يومي فى حياتك لدرجة بتخلى جسمك يفقد توازنه بمجرد بس ما تفكر إنك تبطل الحاجة دي .
ويوم ما بتحاول تبطل العادة دى بيحصل جواك صراع بسميه #صراع_البقاء
لأن العادات إللى عايشة معاك بقالها فترة كبيرة مش بيهون عليها عشرتك أيوه والله زى ما بقولك كده عادات عشرية اوى 😂 على الرغم من أنها ممكن تكون بتسبب لك مشاكل كبيرة.
وعلشان العادات السلبية دى تسيبك فى حالك، وتقدر تتخلص منها بسرعة لازم #تكرها_فيك، وتهملها بالتدريج، لازم تمهد لها إنك خلاص مش عايزها فى حياتك.
اكبر خطأ بنقع فيه أننا نمنع العادات إللى عايشة معنا مرة واحدة.
بعد كل الكلام الجميل ده جه الوقت إللى نقول فيه إزاى نتخلص من العادات السلبية والتي منها التدخين :-
1- خدها بهداوه وتخلص منها بالتدريج وليس بالمنع بمعني انك تبدأ في تقليل كميات تدريجيآ.
2- مارس عادة جديدة إيجابية بشكل يومي لفترة قصيرة من الزمن وليكن انك تمشي ربع ساعة يوميآ وترفعها ايضآ بالتدريج.
3- فكر دايمآ فى الفائدة إللى هتعود عليك بعد التخلص من هذه العادة السلبية من جميع الجوانب ( اقتصاديآ وماديآ - صحيآ ونفسيآ.... الخ )
4- خليك ايجابى واتكلم مع نفسك بطريقة إيجابية وبلاش تحبط نفسك وخلي عندك ثقة فى نفسك وفي قدراتك إنك تقدر تتخلص من العادة دي.
5- كافئ نفسك وابتعد عن المحبطين او من يمارسوا هذه العادة السلبية وتجنب مخالطتهم.
6- ادعي ربنا كتير صدقنى الدعاء يرفع البلاء خليك مؤمن بقدرة ربنا إنه قادر على تخليك من أى عادة سلبية.
7- لازم تشتغل على الدوافع إللى بيخليك مرتبط بالعادة السلبية وتبدأ تفكر فى طرق جديدة علشان تشبع هذه الدوافع.
8- اكتب الإضرار إللى بتسببها لك العادة السلبية وحطها فى مكان ظاهر بحيث تشوفها باستمرار.
9- حدد اشخاص ممكن يساعدوا إنك تتخلص من العادات السلبية وافتكر ان المرء على دين خليله.
10- قارن دايما بين وضعك الحالي وما يجب أن تكون عليه بعد التخلص من العادة السلبية.
اوعي تستهين بقوة العادات لانها ممكن تدمر حياتك، لو معندكش الإرادة الحقيقية وأنت بتواجها وافتكر كويس أوى إن أى تغيير بيكون صعب فى بدايته لكن بعد مرور الوقت بيتحول هذا التغيير إلى واقع نعيشه.
علشان كده لازم تكون أقوى من العادات السلبية لأنها بتكون سبب في زيادة الضغط النفسي وزيادة التوتر وخلى بالك أن التخلص من أى عادة سلبية بيتوقف علي قدرتك على الاستمرار في التخلص منها ومصداقيتك مع نفسك فى التخلص منها.
وهنا يبقي السؤال شاركنا طريقة التخلص من أى عادة سلبية فى حياتك العملية أو الشخصية ومدي تأثير ذلك على جودة الحياة بالنسبة لك ؟
تحياتى
=================================================
0 تعليقات