حياتنا عبارة عن مجموعة من التحديات وكل تحدي فيهم بنخرج منه أقوى من الأول.
ومن أصعب التحديات إللى بتواجهنا فى حياتنا :-
"إزاى نتعامل مع الأشخاص المحبطين "
إللى بيكون تأثيرهم على أفعالنا وعلى قراراتنا تأثير سلبي ممكن يضيع حياتنا كلها بسبب كلامهم المحبط ونظرتهم المتشائمة.
خلينى اقولكم على قصة بسيطة كده بتوضح لنا إزاى نتعامل مع هؤلاء الأشخاص ومن خلال القصة دي هنعرف إيه تأثيرهم فى حياتنا .
كان فى سباق لمجموعة من الضفادع صغيرة الحجم 🐸 وهدف السباق ده هو الصعود لأعلى قمه فى الجبل فى وقت زمني محدد .
إجتمعت الضفادع فى نقطة الانطلاق ومن حولهم ناس كتير جدا عمالين يقولوا " مستحيل يقدروا يطلعوا قمة الجبل " وناس تانية بتقول اكيد كلهم " هيقعوا ويموتوا ضفدع وراء ضفدع " 🐸
وبدأ السباق ومع مرور أول دقيقة بدأت بالفعل الضفادع بالسقوط من الجبل ولسه الناس عماله تقول لهم مستحيل تقدروا تطلعوا وكلكم هتقعوا زى زمايلكم بالظبط .
وبعد مرور 10 دقائق من السباق تقريبا كان أكتر من 80 % من الضفادع وقعوا وما كملوش السباق وده بسبب تأثير كلام الناس عليهم إللى أضعف من عزيمتهم ومن قدراتهم وخلاهم يستسلموا من أول دقيقه .
ولكن ......كان في ضفدع فيهم لسه مكمل وبدأ يكون فى الصدارة ومع مرور أكثر من ثلاثة أرباع وقت السباق كان الجميع وقع من الجبل ما عدا هذا الضفدع الصغير 🐸
وبالفعل بعد إنتهاء الوقت المحدد للسباق قدر الضفدع أن يصل لنقطة النهاية فى أعلى قمة فى الجبل.
وده خلي كل الضفادع يتقربوا منه علشان يعرفوا إزاى قدر يوصل للقمه بالرغم من جسمه الصغير وهنا كانت المفاجأة إكتشفوا أن هذا الضفدع لا يسمع ايوا زى ما بقولكم بالظبط الضفدع طلع أصم 👂👂.
ومن هنا نعرف أن حياتنا مليانه ناس محبطة كل شغلها الشاغل أننا نفضل فى منطقة الراحة ما نتحركش منها ولا نتقدم خطوة واحده ومش بس كده دول كمان ممكن يكونوا بيفرحوا لما يتحقق رأيهم المحبط فينا أو تتحقق رؤيتهم المتشائمة فى حياتنا .
علشان كده لازم نعرف أن كل حاجه بنسمعها أو بنقرأها أو بتتقال لينا بتؤثر على أفعالنا وعلى سلوكياتنا فلازم نختار إللى بنسمعه أو إللى بنقرأه ونعرف لمين نسمع ولمين ما نسمعش.
أفضل تعامل مع الأشخاص المحبطة أو الاخبار اليائسه اننا نتعامل بمبدأ " لا أري لا أسمع لا أتكلم "
لو عايزين تعرفوا إزاى تتخطوا أى تحدي فى حياتكم سواء على المستوى العملى أو الشخصي لازم ما تسمعوش كلام الناس المحبطة لازم ما تسمحوش لأى فرصة تتكلموا فيها معاهم.
تجاهل هؤلاء الأشخاص فى حياتنا هيساعدنا كتير أننا نركز على الحاجه إللى عايزين نوصل لها وهيساعدنا أننا نركز على استغلال إمكانياتنا وقدراتنا بشكل صحيح، وبكده نقدر نتجنب الكثير من المتاعب فى حياتنا ونعرف نركز على الفرص إللى بتجيلنا.
وفي الختام " لا تستسلموا لمن يقول لكم أنكم لا تستطيعون وإجعلوا أفعالكم تبرهن لهم أنكم قادرون "
إلي اللقاء :- كريم محسن
#كيف_تحقق_اهدافك
#احسبها_صح
#لاتسمع_لمن_يحبطك
#كيف_تتعامل_مع_المحبطين
=================================================
احنا موجودين في كل المنصات عشان نوصلكم المعلومة اللي تفديكم في شغلكم او الابتسامة اللي بتساعدنا في مواجهة الظروف الصعبة او يارب يجعلنا سبب في انك تلاقي وظيفة
مستنينكم
***********************
***********************
0 تعليقات