#إزاى_تعيش_سعيد_مطمئن
لما تكون أعظم مخلوق على وجه الأرض وربنا كرمك بنعم كتير جدآ واصطفاك بها على سائر المخلوقات يبقي لازم وواجب عليك تسعي دايمآ إنك تطلع الحلو إللى جواك، ومفيش حاجه أحلي من إنك تتطلع الحلو ده مع ربنا إللى خلقك وأكرمك بكل النعم دي .
طيب إزاى تطلع الحلو إللى جواك مع ربنا؟
الموضوع بمنتهي البساطه يكمن في #التأدب_مع_الله سبحانه وتعالي ومن أعلي مراتب التأدب مع الله هو الالتزام بالقواعد إللى وضعها لينا فى حياتنا سواء من خلال علاقاتنا به سبحانه وتعالي أو علاقاتنا مع الآخرين من بني الإنسان.
مفيش فى حياتك أحلي من إنك تستمر فى إنك #تطلع_الحلو_إللى_جواك حتى وأنت فى أكحل الظروف لأن ربنا سبحانه وتعالي وعده حق عندما يقول " وبشر الصابرين "
ومن هم الصابرين يا الله الذين إذا أصابتهم مصيبة قالوا " انا لله وانا إليه راجعون "
ومن أعظم مراتب الصبر أن تكون فى أسوأ حالاتك والعالم كله يقف أمامك، ولكنك مازالت تحافظ على #إبتسامتك_فى_وجوه_الآخرين ومازالت تمد يد العون والمساعدة لكل الناس إللى حواليك حتى وأنت فى عز الإحتياج للمساعدة .
وقتها....
هتعرف المعني الحقيقي لكل الحلو إللى جواك .
هتعرف المعني الحقيقي لوجودك .
هتعرف المعني الحقيقي كونك إنسان وأعظم مخلوق على وجه الارض.
هتعرف أن لولا إنك عندك إصرار وعزيمه إنك تستمر فى إظهار الحلو اللى جواك ده وتنشره لكل الناس مكنتش هتقدر تكمل وتقف على رجلك بعد كل تحدي بتمر به فى حياتك.
مكنتش هتقدر تستوعب حجم المشاكل والتحديات إللى بتعيشها كل يوم فى حياتك.
مكنتش هتقدر تعيش وتنسي كل الأزمات إللى مرت عليك وكان زمانك عايش فى الماضي ومفيش عندك رؤية المستقبل ولا عارف تستمتع بالحاضر .
إظهارك للحلو إللى جواك وإصرارك إنك دايما تحافظ على إظهاره مهما واجهت من تحديات هو السبيل الوحيد علشان تعيش سعيد ومطمئن وعندك حسن ظن بالله .
علشان كده أوعي تخلى أى حاجه تمنعك إنك تستمر إنك تطلع الحلو إللى جواك وافتكر دايما ان ربنا اداك كل النعم دى وخلقك فى احسن تقويم علشان بس تعيش وتعمر فى الأرض وترضيه في كل معاملاتك معاه سبحانه وتعالي وترضيه كمان من خلال معاملاتك مع الآخرين.
والسؤال المهم دلوقتى هل إنت عندك إصرار إنك تطلع الحلو إللى جواك ولا لسه مفهمتش الحكاية وأن مفيش فى الدنيا حاجه تستاهل إنك تعيشها من غير الحلو إللى جواك ؟
تحياتى
كريم محسن
=================================================
احنا موجودين في كل المنصات عشان نوصلكم المعلومة اللي تفديكم في شغلكم او الابتسامة اللي بتساعدنا في مواجهة الظروف الصعبة او يارب يجعلنا سبب في انك تلاقي وظيفة
مستنينكم
***********************
***********************
0 تعليقات