التخيل الأيجابي (تجربة شخصية)

 

بداية شغلي فى مجال المبيعات كان عندي حوالي 11 سنه وقتها كنت بشتغل فى الإجازة بعد الدراسة فى أحد المولات الشهيرة فى منطقة وسط البلد

 

وبرغم إنى كنت الطفل المدلل فى العائلة لانى وحيد الأسرة وليس لدى اخوات إلا إن كان عندى إصرار إني أشتغل علشان عايز أعتمد على نفسي وأجيب كل حاجه من جيبي الخاص برغم الرفاهية إللى كنت فيها

ولكن كان في دايمآ شئ جوايا بيحركني إني لازم أكون مسئول واتعلم المجال ده كويس وده كان نابع من لحظات الاستمتاع إللى كنت بعيشها لما كنت ببيع منتج من منتجات المكان إللى كنت شغال فيه وقتها كنت بحس بحاجه غريبة جدا لما كبرت عرفتها وهو احساس " الفوز "

وبعد ما كبرت ودرست المجال ده عرفت ان فى علاقة وثيقة بين الثقه بالنفس وبين الأداء الشخصي للإنسان وعرفت أن كل ما كان رجل البيع بيحب نفسه كل ما كان أدائه فى العمل أفضل.

علشان كده الإستمتاع بإحساس الفوز دايمآ هتلاقيه هو المحرك إللى بيخليك كرجل بيع تشتغل أكثر وتجتهد اكتر وبيحفزك إنك تحقق نتائج أفضل.

وبعد مرور فترة من الزمن من العمل فى مجال المبيعات اتعرفت على تمرين مهم جدا ممكن يساعدك انك تحقق المزيد والمزيد من النجاح فى المجال ده وبرغم انه تمرين بسيط إلا أن أثره كبير جدا لو فعلا واظبت عليه .

التمرين ده أسمه " التخيل الإيجابي " وفعلا عايز أقولكم أن التمرين ده بفضل ربنا اولآ وبفضل ممارسته حققت إنجازات كتير جدا لمجرد بس إني كنت مؤمن بالشئ إللى بعمله ومؤمن أن التمرين ده اد ايه مهم جدا فى تحقيق ما أريد

فكرة التمرين بتعتمد على إنك تغذي عقلك بشكل مستمر بالصورة الذهنية إللى عايز تكون عليها فى مجال المبيعات وتغذي عقلك دايمآ بالشئ إللى عايز توصل له وتحققه فى المجال ده .

تدريب العقل بيعتبر من الأدوات المهمه جدآ فى مجال المبيعات لأنه بيساعدك كرجل بيع إنك تكون إيجابي وعندك حماس إنك تفضل تقدم أفضل ما عندك علشان تحقق الصورة الذهنية المرسومة فى عقلك من خلال هذا التمرين .

إزاى بقي تطبق التمرين ده الأمر بسيط جدا ..... مش مطلوب منك غير إنك تغمض عينيك وتتخيل صورة واضحه عن نفسك وأنت أفضل موظف فى المجال ده

على سبيل المثال تتخيل نفسك وأنت محقق أهدافك كلها، وأنت محقق مبيعات وصفات بيع رابحة بأعلى مستوي من الكفاءة

تتخيل نفسك وانت فى مستوي وظيفي أعلي مما انت عليه الآن

وفى كل مرة تعمل التمرين ده مش مطلوب منك غير تقبل الصورة دى فى عقلك وإسترجاعها بشكل واضح وتسترجع معها المشاعر إللى بتحسها وأنت محقق الصورة دى على أرض الواقع .

وبكده هيكون فى مساحة لعقلك الباطن أنه يرشدك لأفضل الطرق فى المجال ده ويديك الطاقة والحماس فى التعامل مع أى صفقة بيع بتمر عليك لمجرد أنه بس فى صورة ذهنية جوه عقلك أنت رسمتها

وده سبب وجيه جدآ يخلى عقلك يخليك دايمآ بتسعي إنك تحقق هذه الصورة الذهنية على أرض الواقع لمجرد بس إنك حولت الصورة دي لتوكيد بداخل العقل من خلال ممارسة تمرين " التخيل الإيجابي "

أتمنى أكون قدرت أوضح لكم الفكرة ولو طبقتوا التمرين ده وفرق فعلآ معاكم اكتبولى فى التعليقات إيه المشاعر والأفكار إللى جت لكم بمجرد ما طبقتوا التمرين وايه هي الصورة الذهنية إللى رسمتوها داخل عقولكم وما هو الإنطباع بعد تطبيق التمرين ؟

منتظر مشاركاتكم

#كيف_تحقق_مببعاتك

#مهارات_البيع

#التخيل_الايجابي

#البيع_كما_يجب_ان_يكون

تحياتى

كريم محسن

 =================================================

احنا موجودين في كل المنصات عشان نوصلكم المعلومة اللي تفديكم في شغلكم او الابتسامة اللي بتساعدنا في مواجهة الظروف الصعبة او يارب يجعلنا سبب في انك تلاقي وظيفة

مستنينكم

قناة التليجرام Telegram

قناة التيك توك TikTok

تابعونا على اليوتيوب

جروب الفيس بوك

تابعونا على الأنستجرام

تابعونا على الفيس بوك

تابعونا على الفيس بوك البديل

 

***********************

***********************