" على نياتكم ترزقون " من الحكم الجميلة جدآ واغلبنا يعرفها تمام المعرفة
فى مرة كان عندي محاضرة بعنوان " كيف تخطط لحياتك "
ومن ضمن هذا البرنامج كان في وقت مخصص للنقاش مع الحضور عن أهدافهم وأحلامهم.
وقتها سألت سؤال للجميع لو بتحلموا تركبوا عربية 🚘 تحبوا يكون نوعها ايه ؟
توالت الإجابات فى إللى قال عايز مرسيدس، وفى إللى قال عايز اركب بي ام، وفي إللى قال مش هكون طماع عايز اركب 128 😂
قلت لهم جميل جدآ إن كل واحد فيكم عارف كويس هو عايز إيه..... ولكن السؤال المهم إزاى نقدر نوصل للشئ إللى عايزينه ؟
لو حلمك إنك تركب عربية فاخرة لو عندك النية والعزيمة والإصرار إنك توصل للحلم ده هتحققه أو هتوصل لحاجه قريبة منه جدآ.
خلي حلمك ادامك، واوعي تسمح إنك تحيد عنه حتي لو كان بالنسبة لك صعب البلوغ، وافتكر إن الصعب أمام قدرة ربنا مفيش أسهل ولا أيسر منه، طالما عندك النية الصافية لتحقيقه.
احذف كلمة مستحيل من قاموس حياتك لأن الله على كل شئ قدير واللى أنت شايفه النهارده صعب أو مستحيل مش محتاج منك غير إنك تجتهد وتسعي وماتبطلش تحاول وأنت عندك يقين بالله إن لكل مجتهد نصيب.
علشان كده مش مهم خالص إنك تبدأ صغير لأن الصغير هيكبر لو عنده الطموح وعنده الفكر العظيم إللى ينقله من مرحلة لمرحلة تانية أكبر وأفضل.
مش مهم خالص إن مواردك تكون محدوده، أو إنك اتولدت فى بيئة بسيطة، المهم إنك ما تفضلش على الوضع ده لحد ما تموت وأنت لسه ما اتحركتش من مكانك.
من حقك إنك تحلم وحلمك يكون كبير طالما دائما بتسعي إنك تطور من نفسك وكل يوم بيعدي عليك بتكون أفضل من اليوم إللى قبله.
علشان تقدر تحقق إللى بتحلم به أبدا دلوقتى حتي لو البداية كانت بسيطه، وما تنساش أن الأهداف الكبيرة بتتحقق من خلال تقسيمها لأهداف أصغر منها.
وافتكر إن مفيش حد بيطلع السلم مرة واحدة، المهم إنك تكون مستعد دايمآ للخطوة إللى جاية.
(إبدأ صغيراً، فكر كبيراً، لا تقلق على أشياء كثيرة في نفس الوقت، إبدأ بالأشياء البسيطة أولاً ثم تقدم إلى الأشياء الأكثر تعقيدا).
-ستيف جوبز
تحياتى
كريم محسن
=================================================
احنا موجودين في كل المنصات عشان نوصلكم المعلومة اللي تفديكم في شغلكم او الابتسامة اللي بتساعدنا في مواجهة الظروف الصعبة او يارب يجعلنا سبب في انك تلاقي وظيفة
مستنينكم
***********************
***********************
0 تعليقات