" كيف تكتسب الخبرة قبل التخرج "
"مطلوب شباب حديثي التخرج للعمل فى المبيعات خبرة لا تقل عن 5 سنوات 🤔
"مطلوب مقدمي طعام للعمل فى مطعم ....... السن لا يزيد عن 23 سنه وخبرة فى مجال العمل لا تقل عن 3 سنوات 🤔
"مطلوب بائع للعمل فى براند ملابس مشهور السن لا يزيد عن 24 سنه خبرة فى مجال البيع لا تقل عن 3 سنوات 🤔
كل يوم بنشوف العديد من اعلانات الوظائف المعروضه للشباب بالاخص حديثي التخرج ومن اهم متطلبات هذه الوظائف الخبرة من شباب لسه يادوب متخرج .
والسؤال اللى اغلب الشباب دايما بيسالوه ❓‼
"ازاى عايزين خبرة لا تقل عن 5 سنوات من شباب لسه متخرج طازه ؟
وهنا لازم نعرف حاجه مهمه جدا مش صعب انك تكون صاحب خبرة حتى لو لسه متخرج والموضوع وما فيه هو انك تكون بتعرف ازاى تستغل وقتك بشكل صحيح ولو عايز تمتلك الخبرة وانت لسه بتدرس ممكن تعمل الآتى:-
✍ العمل التطوعي :- من أهم العوامل إللى تساعدك على اكتساب الخبرة فى مجالات مختلفة لمجرد انك بتشتغل اوقات فراغك فى العمل التطوعي وده بيساعدك على اكتساب الخبرة وبناء علاقات قوية تساعدك فى المستقبل.
✍ العمل فى الاجازات :- الكثير من الشباب يعلم تماما أهمية العمل فى الاجازات ولكن عدد قليل جدا هو من يبادر وينزل سوق العمل ويرضي براتب قليل للعمل في الإجازة الدراسية بدافع التعلم واكتساب الخبر.
مش عيب انك تكون فى كلية معينه مثلا وتنزل تشتغل فى اى مجال آخر تكتسب فيه خبرة ويكون عندك C.V مليان بالعديد من الوظائف إللى اشتغلتها فى فترة الإجازة وده هيعكس رؤية واضحه على انك شخص طموح ومتحمل المسئولية ويعتمد عليه ويتيح لك فرص مش ممكن تتاح لشخص آخر معندوش خبرة فى شئ .
✍ التدريب العملي وتطبيق ما يتم دراسته :- لو كل طالب جامعه اهتم بتطبيق ما يتعلمه والنزول إلى ميدان العمل خلال اوقات الفراغ لاكتساب الخبرة العملية مع الخبرة النظرية هتكون عنده فرصة حقيقية فى سوق العمل بعد التخرج يعنى لو انت فى كلية تجارة انزل تدريب فى مكتب محاسبة لو انت فى كلية حقوق انزل تدريب فى مكتب محاماة وهكذا ....
✍ ممارسة شغفك :- لو انت طالب وعندك شغف فى مجال معين اوعي تستنى لحد ما تتخرج وتخلص دراستك وبعد كده تفكر في شغفك لأنك لو عملت كده هتكون بتضيع على نفسك فرصة انك تحول شغفك إلى بيزنس خاص او انك تشتغل فى الحاجه اللى بتحبها علشان كده مارس شغفك حتى لو كنت بتدرس اشغل اوقاتك فراغك فى شئ عندك شغف فيه ووقت ما تخلص دراسه هتلاقي عندك خبرة فى المجال ده تساعدك انك تشتغل فى الشئ إللى انت شغوف فيه.
دى اربع نصائح مهمه جدا لأى شاب عايز يكتسب الخبرة وهو بيدرس بحيث انه لما يتخرج يكون عنده فرص حقيقية يقدر يستغلها لمجرد أنه عرف ازاى يستفاد من الوقت خلال دراسته بشكل سليم .
وبكده تقدر يكون عندك خبرة وأى مكان يتمنى وجودك معاه لأنك شخص تحملت المسئولية وعرفت ازاى تستغل وقتك وتعتمد على نفسك حتى وانت بتدرس ، وقتها مش هتتردد لحظه انك تروح تحضر الانترفيو وهتتكلم بكل ثقه لأنك فعليا عندك الخبرة والمعرفة إللى تؤهلك انك تفوز بالوظيفة .
#كريم_محسن K.M
=================================================
احنا موجودين في كل المنصات عشان نوصلكم المعلومة اللي تفديكم في شغلكم او الابتسامة اللي بتساعدنا في مواجهة الظروف الصعبة او يارب يجعلنا سبب في انك تلاقي وظيفة
مستنينكم
***********************
***********************
0 تعليقات