SUPER MARIO "
مين فينا ما لعبش سوبر ماريو ، اللعبة دى هي الراعي الرسمي لجيل كامل مكنش وراه حاجه غير أنه يستمتع بكل مرحلة بيعديها، لحد ما يقابل الوحش ويفوز عليه ويدخل فى مرحلة تانية من مراحل اللعبة.
وتستمر الانتصارات ويا سلام بقي لما تقفل اللعبة وتوصل لنهايتها كده انت بقي بقيت خبير "Super Mario" .
الوحش ده بقي ممكن يكون عباره عن محنة كبيرة هتمر علينا وممكن يكون تحدى كبير هنقابله وممكن يكون جاي لينا فى ثورة فرصة حقيقية ممكن تتقلب للضد لو مش مستعدين لها.
ولكن لولا مرورنا بالمرحلة كاملة من بدايتها لنهايتها مكناش هنقدر نعدى " مستوي الوحش " وننتصر عليه.
علشان كده اوعي تستعجل إنك تقابل الوحش من غير ما تعدى على المرحلة من البداية لأنك لو استعجلت إنك تقابله للأسف احتمالية فوز الوحش عليك هتكون أكبر بكثير من احتمالية فوزك عليه، وده لسبب بسيط جدآ هو إنك هتكون مش مستعد كويس إنك تقابله.
خليك " Super Mario " خليك دايما مستعد اتدرب كويس واجتهد وعافر وخد خبرة تخليك فى أفضل حالاتك لما تقابل الوحش
وقتها هتحس فعلا إنك بتستمتع بكل تحدى أو محنة هتقابلك فى حياتك لانك عارف كويس اوى أن اى عسر هتمر به بيكون فيه فرص كتير جدآ استحالة تعرف تستغلها إلا لو كنت مستعد من البداية وعندك خبرة مسبقة مبنية على جهد وتعب .
خليك " Super Mario " واوعي تستسلم لفكرة إنك عارف كل حاجة وتبطل تتعلم وتطور من نفسك فى مجالك مهما كان منصبك ومكانتك لان نجاحك الحقيقي بيقاس بما تملك من مهارات وممارسات فعلية لهذه المهارات وقتها هتحس بثقة كبيرة فى ربنا اولآ قبل اى حاجة وثانيآ فى قدراتك وامكانياتك.
خليك " Super Mario " وبطل إنك تشغل بالك بالصعود للسلم مرة واحدة لأن حتي لو صادفت وطلعت مرة واحدة هيكون سقوطك اسرع وأسهل بكتير من صعودك وخليك دايمآ فاكر إن الخطوات الصغيرة المدروسة والمبنية على أسس سليمة بيكون فيها بركة وبتحقق نتائج أكبر بكتير من خطوات كبيرة مش مدروسة.
خليك " Super Mario " وبلاش تجري وراء شئ اسمه لا نهاية لأنك مهما بلغت من نهايات لن تكون راضي لأنك مش محدد من البداية أنت عايز توصل لفين وده هيكون سبب إنك تفضل تجري وراء سراب وهتفقد مع الوقت لذة الإستمتاع بالنتائج والنعم إللى الواحد مننا غرقان فيها و ده لوحده كفيل انك تكون عايش ومش عايش بلا هدف وبلا معني ومش محدد لنفسك هوية واضحة ومحددة أو بمعني اصح هتبقي بتاع كله.
خليك " Super Mario " واحتفل بأى إنجاز بتحققه حتى لو كان بسيط حتى لو الإنجاز ده متمثل فى إنك بتقلل من حجم الخسائر لأنك لما بتعرف إزاى تقلل من خسارتك حتمآ ولابد هيجي عليك الوقت إللى تحولها إلى مكسب حقيقي المهم اوعي تفقد تركيزك أو تحيد عن أهدافك لان الهدف مش بيتغير لكن طريق الوصول إليه هو إللى ممكن يتغير.
وفي الختام بتمني لكم السعادة والتوفيق واسأل الله العظيم لى ولكم أن يرزقنا الرضا والستر وأن يحقق لكم كل أمانيكم ويسعدني الرد على استفساراتكم فى التعليقات
تحياتي
كريم محسن
=================================================
احنا موجودين في كل المنصات عشان نوصلكم المعلومة اللي تفديكم في شغلكم او الابتسامة اللي بتساعدنا في مواجهة الظروف الصعبة او يارب يجعلنا سبب في انك تلاقي وظيفة
مستنينكم
***********************
***********************
0 تعليقات