جلسة مع الذات

 


"قعدت مع نفسي وعزمتها على حاجه حلوة " 👌👌
عمرك فكرت تاخد نفسك كده فى إيديك وتعزمها على حاجه حلوة 👉
طيب عمرك فكرت إنك تقعد مع نفسك وتتكلم معاها بمنتهى الوضوح وتعرف إحتياجاتها وإيه اللى بيدور جواها وإيه اللى بيزعلها وإيه اللى بيفرحها .
طيب عمرك خدت رأي نفسك فى أى حاجه فى حياتك وشاركتها فى أى قرار بتاخده فى حياتك .
زمان كنت بحب أقعد مع الناس الكبيرة فى السن لأنى كنت بستفاد منهم جدآ وبكتسب خبرة فى الحياة من واقع تجاربهم إللى عشوها .
وفي مرة من المرات كنت قاعد مع أستاذ ع أ فى مكتبه فى الشركة إللى كنت شغال فيها فى مجال "الدواء" .
وقتها كنت داخل على قرار مصيري وكنت بأخد رأيه فى الموضوع وفجأة لقيته بيقولي سيبك من رأيي، المهم إنك تقعد مع نفسك 🤔 كده وتشوف هي عايزه إيه.
بصراحة وقتها قلت ممكن يكون مشغول ومش منتبه ليا واخدت نفسي وخرجت من المكتب بعد ما شكرته على النصيحه .
وقتها فكرت فى النصيحة دى وقلت يا واد جرب تقعد مع نفسك وتشوف النتيجه .
وفعلا قعدت مع نفسي وكلمتها وكلمة مني على كلمة منها 😂😂 وفي الآخر قدرت أخد قرار واضح مبني على إتفاق يبنى وبين نفسي.
من وقتها وأنا بقعد مع نفسي كتير لما أكون فى حيرة من أمري في موضوع معين أو لما بحس إنى مخنوق أو متضايق من حاجه .
ومش بكتفي بس إني أقعد معها وبس ولكن كمان لما بيكون القرار ده صحيح بعزمها على حاجه حلوة هي بتحبها علشان ما لما أحتاج أقعد معاها الاقيها وتطاوعني.
ومع مرور الوقت درست علم النفس واكتشفت أن النصيحة دى من أهم النصائح إللى اتقالت لى فى يوم من الأيام لأن زى ما الشغل والبيت والأولاد لهم حق عليك كمان نفسك لها حق عليك ومحتاجه جدآ لجلوسك معاها من وقت للتانى .
ولكن ..... مهم جدآ إنك تكون عارف إزاى تتكلم معاها وعارف إزاى تخليها تفكر بشكل ايجابى وتبادلك نفس المشاعر الايجابية .
وعلشان تعرف إزاى تقعد مع نفسك والقعدة دى تنجح أنت محتاج تعمل إللى هقولك عليه وجرب وشوف :-
✍ اختار الميعاد المناسب للجلوس مع نفسك بحيث تكون الزمان والمكان مناسبين للحوار مع نفسك .
✍ حدد المواضيع إللى عايز تتكلم فيها مع نفسك واكتبها وحدد النقاط الرئيسية لكل موضوع .
✍ خلى الجلسة مع نفسك تكون مكتوبه حتى ولو كانت عبارة عن شخابيط المهم تكون مكتوبة .
✍ ادي مساحة لنفسك للتعبير عن مخاوفها أو رفضها أو موافقتها ولا تحتكر النقاش للعقل أو للقلب فقط .
✍ اكتب نتائج القعدة والحاجات إللى اتفقت عليها مع نفسك وحط لها مواعيد للمراجعة والتقييم .
✍ حدد طريقة تكافئ بها نفسك فى حالة إنجاز المطلوب فى الوقت اللى اتحدد بينكم .
الطريقة دي فعلا فرقت معايا كتير فى حياتى وأكيد بإذن الله تفرق معاك أو معاكي.....ولكن مهم جدآ أنكم ما تملوا وتعرفوا أن نجاح التمرين ده مش بيكون من أول مرة على الأقل لازم تمارسوه فترة على الأقل لحد ما نفسك تتعود على جلوسها معاك وأنتم كمان تتعودا على الوضوح والصراحه مع النفس .
وقتها هتحسوا أد إيه الجلسة مع النفس من أهم العوامل إللى ممكن تساعدك إنك تعمل صيانة دورية لنفسك ومش بس كده ده انتم هتقدروا تكتشفوا نفسكم فى كل مرة بتقعدوا معاها وهتسوفوا مفاجأت كتيرة كانت ضايعة عليكم لمجرد أنكم مش بتدوا وقت للجلسة مع النفس 👌
تحياتى
#كريم_محسن K.M

=================================================

احنا موجودين في كل المنصات عشان نوصلكم المعلومة اللي تفديكم في شغلكم او الابتسامة اللي بتساعدنا في مواجهة الظروف الصعبة او يارب يجعلنا سبب في انك تلاقي وظيفة
مستنينكم



***********************


***********************

إرسال تعليق

0 تعليقات