مبادئ التسويق الاساسية(العملاء بقو متعبين جدا)


 العملاء بقوا متعبين جدآ والسوق مش مشجع خالص على إن الواحد يحط إستثمار فى شئ في تعامل مع #نوعية_العملاء المتواجدين حاليآ، برغم إن معنديش أى مشكلة فى الموارد ولا الأصول إللى تخليني أفتح محل واتنين لكن متردد جدآ بصراحة من كتر ما بشوف ناس كتير بتشتكي من تعامل العملاء والفصال الكتير ووجع القلب بالشكل ده علشان كده بفكر افتح مطعم أو كافيه حاجة سهلة والناس برضوا بتقول إن المجالات دى ناجحة مافيهاش تعب مع العملاء.

دي كانت بداية الحديث بينى وبين أحد عملائي الذي أعتز بهم كثيرآ والحمد لله إحنا دلوقتي أصدقاء وحبايب كمان....ولكن وقتها زعلت جدآ من الكلام ده ودرجة الزعل عليه كانت أكبر بكتير من الزعل من كلامه، وده لأنه أصدر أحكام على العملاء لمجرد إنه سمع ناس بتقول إنهم متعبين وبناء على كلام الناس قرر انه مش هيفتح البيزنس وغير فكرته واتجه إلي مجالات تانية ليس لديه فيها أى خبرة أو معرفة. 

مع الأسف الشديد هناك الكثير من #الإعتقادات_الخطأ التى تسيطر على تفكير أصحاب الأعمال أو من يفكرون فى فتح البيزنس الخاص بهم ومن أهم هذه الإعتقادات أن العميل لو طال يأخذ المنتج أو الخدمة ببلاش هيعمل كده، والعميل مش بيهتم غير بالسعر الأقل وبس وده #إعتقاد_كارثي مع الأسف وممكن يعطلك كتير جدآ ويضيع عليك فرص أكتر.

خلينا في البداية نوضح مبدأ مهم جدآ من #مبادئ_التسويق_الأساسية واللي بيقول إن أصول الشركات والمنشآت ليس لها قيمة بدون العملاء يعني لو حضرتك عندك محلات أو فروع لشركتك أو منتجات أو خدمات كتير جدآ ومعندكش عملاء كل ده ليس له قيمة بدونهم.

علشان كده المبدأ التاني من مبادئ التسويق يتمثل في أن الواجب الأساسي للشركات والمنشآت هو #إجتذاب_العميل_بصدق وهنا لما بيكون دورك البحث عن العميل ده بيخليك تعرف أكثر عنه وعن طريقة تفكيره، وإزاى اصلآ تقدر توصل له بأساليب كتير جدآ وازاى بيشتري وما هي الدوافع المحركة له وده بيكون السبب الرئيسي إنك تعمل بيزنس قريب من الناس وهدفه حل مشاكلهم مش أى بيزنس والسلام وبعد كده نرجع نشتكي من المنافسة وحرق الأسعار.

وهنا يتضح لنا المبدأ الثالث من مبادئ التسويق واللى بيقول إن وسيلة جذب العميل هي #الوعد_بتحقيق_إشباع_إحتياجاته، وهنا بيكون دور وواجب التسويق إنه يعرف ويشرح ويقدم الوعود ويتأكد من الإشباع للعميل وإن هذه الوعود تتحقق من خلال ما نقدمه من منتجات وخدمات وبكده العميل مش هيكون عنده مشكلة خالص في السعر وهنا دورنا أننا #نعظم_قيمة_المنتج أو الخدمة بتاعتنا والتعظيم لابد أن يكون واقعي وحقيقي وقتها العميل عمرة ما هيقولك #سعرك_غالي ولا هيفاصل في السعر.

علشان كده لما نفكر إننا نعمل مشروع أو نفتح بيزنس مينفعش خالص نبني البيزنس وناخد قرارات بناء على كلام الناس او رؤية حد تجاه العملاء او المجال اللى ناوين ندخل فيه ولكن يجب بناء أى بيزنس على مبادئ التسويق الأساسية اللي بتقول:- 

1️⃣ أصول الشركة أو الكيان بتاعك ليس لها قيمة بدون العملاء.

2️⃣ الواجب الأساسي لك هو اجتذاب العملاء.

3️⃣ وسيلة جذب العميل الأساسية هي الوعد بتحقيق إشباع إحتياجاته.

4️⃣ واجب ودور التسويق تعريف وشرح وتقديم الوعود والتأكد من الإشباع.

5️⃣ الإشباع ده يتأثر بأداء كل قسم داخل الكيان بتاعك.

6️⃣ بناء البيزنس يجب أن يكون مبني على أسس تسويقية وليس أهواء أو آراء شخصية.

7️⃣ إبراز قيمة وفائدة ما تقدم من منتجات أو خدمات يقلل من ألم السعر.

وفي الختام 

من واقع خبرتك ما هي المبادئ التى يمكن إضافتها على ما ذكر في البوست ؟ 

إلي اللقاء  

كريم محسن

=================================================

احنا موجودين في كل المنصات عشان نوصلكم المعلومة اللي تفديكم في شغلكم او الابتسامة اللي بتساعدنا في مواجهة الظروف الصعبة او يارب يجعلنا سبب في انك تلاقي وظيفة
مستنينكم



***********************


***********************

إرسال تعليق

0 تعليقات