كان فى محل ملابس فاتح بجوار البيت عندي ولانى كنت دايمآ بحب أشجع أى حد بيفكر أنه يستقل ويفتح مشروعه الشخصي، ففي يوم من الأيام قررت إنى أنزل المحل ده واشتري منه .
نزلت المحل وأنا كل هدفي إنى أشجع الشباب إللى موجودين فى المحل واشتري منهم كنوع من أنواع التقدير والدعم والتشجيع وتبارك لهم إفتتاح المحل الجديد .
دخلت المحل وقولت السلام عليكم ورحمة الله وبركاته
الشاب اللى الموجود فى المحل رد السلام وهو قاعد على الكرسي وماسك التليفون .
بصراحه ما اخدتش فى بالي قلت يمكن مشغول والله أعلم بظروف الناس وفضلت أتفرج على اللبس واختارت مجموعة ملابس وكنت حابب انى اشوف المقاس مناسب ولا محتاج مقاس تانى، وبمنتهى العفوية إللى فى الدنيا بقوله لو سمحت فين غرفة القياس .
رد عليا من غير حتى ما يكلف نفسه حتى ويبص لي وهو بيشاور بإيده و بيقولي عندك هناك على اليمين .
استغربت جدا من أسلوبه وقلت فى قرارة نفسي أن المحل ده لو الشباب إللى فيه أسلوبهم كده مع العملاء مش هيكملوا وبالفعل خرجت من المحل وأنا عندي يقين أن المحل ده هيقفل .
وطلعت البيت وبحكي التجربة لزوجتي وشافت الملابس وفعلا الخامات كانت حلوة جدا واسعارهم معقولة لكن انا رديت عليها قلت لها المحل ده مش هيكمل 3 شهور وهيقفل .
ردت عليا زوجتى وقالت لى إيه إللى مخليك متأكد كده طيب قول سنه حتى تبقي مقبولة.
قلت لا مش هيكمل بحكم خبرتي أقدر أقولك إن المحل إللى مش بيهتم بالعميل مهما كان بيقدم منتجات جودتها حلوة عمره ما هيكمل .
وخلص النقاش على كده وفي يوم قاعد من اصدقائي من نفس المنطقة إللى انا فيها ولقيتهم بيقولوا لى على طريقة تعامل الشباب إللى فى المحل الجديد وانهم بيعاملوا الناس بطريقة فيها اهمال وعدم مهنية.
وبالفعل لم يمر 3 أشهر والمحل أغلق ولقيت مكتوب عليه للإيجار، ولما سألت عن الأسباب كان أحد أهم الأسباب هو سوء تعامل الشباب فى المحل مع العملاء، وده خلى أغلب الناس ما تشتريش منهم على الرغم من أن المنتجات بتاعتهم ذات جودة عالية .
ومن هنا هنلاقي أن المحلات والشركات إللى بتهتم بعملائها بتكسب أكتر بكتير من غيرها .
وهنلاقي كمان أن العميل الراضي بيكون أكثر مواظبه على الشراء منك بنسبة كبيرة جدا .
ولو أنت مش بتهتم بعملائك مهما كنت بتقدم إيه هيجي عليك اليوم ومش هتكمل وهتقفل .
علشان كده لازم نعرف أن العميل إللى بيتأثر بمنتجاتك وخدماتك هو نفسه إللى ممكن يعمل لك دعاية بأسمك ببلاش حسب خدمتك له .
وكل ما قدرت تقدم خدمة جيدة لعملائك وتسعدهم كل ما كانت هذه الدعاية المجانية في صالح البيزنس بتاعك وهتساعدك إنك تكبر أكتر وتخليك تستمر مهما كانت الصعوبات إللى بتواجهك .
إهتمامك بالعميل سر مهم جدا من أسرار نجاح الشركات العملاقة حول العالم واللى بيطبق السر مع العملاء هو اللى بيقدر يفوز وينجح وأى حد بيتجاهل السر ده للأسف مش هيكون له وجود على المدي البعيد.
" الجميع الان يتسابق لجعل تجربة الشراء متميزة للعملاء "
✍وفى الختام لو مريت بموقف غير وجهة نظرك فى براند أو محل بسبب خدمة جيدة أو سيئة ياريت تشاركنا التجربة فى التعليقات وتقول لنا رأيك من واقع تجربتك .
تحياتي
=================================================
0 تعليقات