#بعبع_المنافسة
الكثير من الشركات بتخاف من المنافسة، ودائماً بتعمل #حساب_المنافسين، و بالبلدى كده ماشين بقاعدة مهمه جدا وهي :- عين على شركاتهم وعين على المنافس"
وبرغم أن القاعده دى مهمه جدآ جدآ لحفاظ الشركات على حصتهم السوقية وعلى إستمرار أعمالهم، ولكن بيجي منافس ولا على البال ولا على الخاطر يأخذ منهم حصة كبيرة من السوق، وممكن يسبب لهم مشاكل كبيرة جدآ هما مش عاملين حسابها.
طيب ايه السبب إللى يخلى شركات كبيرة جدآ تقع وتنهار بسبب منافس صغير لسه سنه أولي بيزنس.
بصراحه لما بحثت فى الموضوع ده لقيت إن له أسباب واضحه وضوح الشمس وبرغم وضوحها إلا أن أغلب الشركات بتهمل الأسباب دي لاعتقادهم أنهم أكبر منها وبعيدين كل البعد عن هذه الأسباب .
1️⃣ #الإعتماد_على_أهل_الثقه وليس اهل الكفاءة وده بيخلى بيئة العمل طارده للعمالة المتميزة وبيأثر على المدى البعيد على حاجات كتيرة جدا تم بنائها فى سنين زى " سمعه الشركة " "ضعف مخرجات العمل"
وده سبب واضح لانتصار اى منافس على اى شركة بالاضافه الى عدم مواكبة التطور وهذا السبب هو اللي خلى شركة زى نوكيا بعد ما كانت رقم واحد فى العالم أصبحت فى ذيل القوائم.
2️⃣ #المنافسة_الداخلية، وعدم الاهتمام بالكوادر والكفاءات، بصراحة السبب ده ممكن يخلق للشركات منافسين اقوى بكتير من المنافسين فى الخارج وده لان المنافس الداخلى هو اكتر واحد عارفك وحافظ طريقة تفكيرك علشان كده لازم الشركات تهتم بتنمية كوادرها ورفع إمكانياتهم وتعزيز ولائهم و انتمائهم وإعطائهم حقوقهم على أكمل وجه .
3️⃣ #المركزية_فى_القرارات من اصعب الأسباب إللى ممكن تخليك تفقد الكثير من الفرص إنك تكون ماشي بسياسة one man show وكل حاجه فى بيئة العمل محتاجه توقيع وقرار مركزى، وده هيخلى فى فرصة ومجال لأى منافس أنه يسبقك من خلال علاقات قوية مع شركاء النجاح إللى ممكن يزهقوا من طريقة عملك لأنها معقدة وقديمة ده طبعا غير سمعتك إللى هتتهز فى السوق وهتخلى الناس مش حابة تتعامل معاك .
4️⃣ #عدم_الاعتراف_بالعلم ومحاولة تطبيقه بعشوائية للأسف فى شركات كتير جدآ مش بتعترف بالعلم ولا بمن طبق هذا العلم، وده بيكون سبب رئيسي أن الشركات دي تفضل عايشه الوهم لحد ما ينتصر العلم وتحصل المفاجأة إللى مش عاملين حسابها ويجى منافس بتكنولوجيا جديده يقعدهم فى البيت .
5️⃣ #عدم_الاهتمام_بالتسويق على اعتقاد منهم أنه إهدار للمال وده بيخلي تصنيف الشركات دى فى الارض لأنهم مش بيوصلوا لعملائهم بالشكل الصح وده بيدى فرصة للمنافس أنه يبنى علاماته التجارية ويعزز صورته الذهنية فى أذهان عملائه ويستحوذ على أكبر شريحة من السوق لأنه اهتم بالتسويق واحترم ثقافة عملائه ودراس سلوكهم صح وعارف ازاى يوصل لهم .
تلك خمسة أسباب ممكن تضع اى شركة فى منافسة شديدة غير المنافسة الخارجية والأسباب دى فى مجملها ممكن نطلق عليها عدم الكفاءة وبكده نكون عرفنا أن عدم الكفاءة والمنافسة وجهان لعملة واحدة لأنهم بيأدوا لنفس النتيجه وهي خروج الشركات من السوق
ولازم نكون عارفين ان من لم يتقدم يتقادم وزى ما الشركات لازم تبص على المنافسين خارج الكيان بتاعها لازم كمان تطور من نفسها وتبص على البيئة الداخلية وتسعي لتحسينها حتى لا تزداد المنافسة وتتسع الدائرة والفجوة.
تحياتي
=================================================
0 تعليقات