من خلال العديد من النقاشات والأسئلة والإستشارات إللى بتجيلي لقيت إن أغلب الناس عندهم نفس العقبة إللى دائمآ بتوقفهم وبتخليهم من عارفين يعملوا إيه علشان يوصلوا للحاجه إللى عايزنها بشكل صحيح ؟
العقبة دى هي إن الواحد مننا بيكون عارف هو عايز إيه كويس أوي ولكن دايمآ بيكون مش عارف ازاى يبدأ ؟
بصراحه مفيش فى حياتنا كلها أصعب من الخطوة الأولى فى أى حاجه بنعملها.
تعالوا كده مع بعض نفتكر بعض المواقف :-
أول خطوة فى البحث عن عمل.أول خطوة فى البحث عن بنت أو إبن الحلال.أول خطوة تجاه تحقيق أى هدف فى حياتنا.أول خطوة تجاه استقلالنا الوظيفي.أول خطوة لما حبينا نعمل shift career أول خطوة لما جينا نطلب زيادة فى الراتب أول خطوة فى اى حاجه احنا كنا مقدمين عليها فى حياتنا كلها .دائمآ هنلاقي أن #الخطوة_الأولى دى كانت صعبة جدآ جدآ علينا.
ولكن بعد ما بنخطي الخطوة الأولى دي نكتشف أنها ولا صعبة ولا حاجه والصعوبة اللى كنا رسمنها فى خيالنا كانت بسبب أننا مش بيكون عندنا Feedback إيه إللي هيحصل بعد كده، ومش بنكون عارفين #ردة_الفعل إللى ممكن تحصل بعد الخطوة الأولى دي.
علشان كده لازم نعرف حاجه مهمه جدآ لو إحنا مش عارفين #البداية_إزاى أو إيه اللي مفروض نعمله #علشان_نحقق_أى_حاجه_فى_حياتنا سواء كانت على المستوى العملي أو الشخصي لازم ولابد اولآ #نتمتع_بالشجاعة_والجرأة على اتخاذ الخطوة الأولى بس بعد ما ندرسها من جميع الجوانب
.وبمجرد ما نبدأ بالخطوة دى هنكتشف أن إللى كنا خايفين منه مفيش أحسن منه.
#الخطوة_الأولى هي المفتاح إللى هيفتحلنا كل الأبواب المغلقة بعد كده مش مطلوب مننا أننا نفضل نشغل تفكيرنا فى إيه هيحصل بعد كده ونشغل تفكيرنا فى #البحث_عن_المجهول إللى مش هتعرف اذا كان خير أو شر إلا بعد ما نبدأ بالخطوة الأولي.....
لكن مطلوب مننا أننا نبدأ step by step طالما الخطوة دى محسوبة ولا يوجد فيها ما يغضب الله " #اعقلها_وتوكل "
#البدايات_الصحيحه لأى عمل فى حياتنا تبدأ بالفكر والتخطيط وأننا نعمل حساب كل كبيرة وصغيرة وده أسمه " #الأخذ_بالأسباب"
وبعد ما نفكر ونخطط ونأخذ بالأسباب نبدأ بمرحلة السعي ونحط كل حاجه فكرنا فيها وخططنا لها فى الفعل من خلال خطوات واضحه نحو #التنفيذ_المتأني ونحط تحت كلمة المتأني دى 100 خط
ولكن فى نقاط مهمه جدآ لازم ناخدها بعين الإعتبار وإحنا بنبدأ فى تحقيق أى حاجه عايزين نوصل لها .
ادي كل حاجه حجمها الطبيعي وبلاش توصل لمرحلة انك تكون مخطط جيد ولكن التنفيذ زيرو بمعنى بلاش التخطيط يأخد وقت كبير اكتر من اللازم .
اوعي تستعجل النتائج بالأخص لو الشئ إللى عايز توصل له مهم جدا بالنسبة لك لان كلما زادت أهمية الشئ كلما قلت احتمالية انه يتم بإستعجال .
كسر أهدافك الكبيرة وقسمها إلي أهداف صغيرة وخليك فاكر إن الألف ميل بيبدأ بخطوة وعمرك ما هتوصل للأهداف الكبيرة إلا لما تحقق الأهداف الصغيرة الأول .
ضاعف مجهودك بالتدريج أوعي تقع فى فخ " الحماس الزائد " لأنه فى الغالب مش هيعدي عليك وقت كتير غير لما تصاب بالإحباط واليأس وده بسبب إنك عملت مجهود كبير ومضاعف بشكل سريع متجاهلآ قدراتك وإمكانيات الحالية والنتائج غير ملموسه.
استعين دايما بالأشخاص إللى مشيوا نفس الطريق قبل منك ده هيقصر عليك المسافات كتير وخد منهم ونفذ وأحكم بعد التنفيذ مش قبله لان فى الغالب هتلاقي لهم خطوات كتير غير منطقية قد لا تقتنع بها ولكن نتائجها هتكون مبهرة بالنسبة لك لمجرد بس انك جربتها.
اهتم جدا إنك تبص جواك وتشوف نفسك بعيونك مش بعيون الآخرين وده هيساعدك كتير فى عملية التقييم الذاتي وانك تعرف تحاسب نفسك صح وتكافئها كمان وبكده هتكون تخلصت من عقدة الناس بتشوفني ازاى .دى مجموعة من النقاط المهمة إللى ممكن تساعد أى إنسان مش عارف إزاى يبدأ وتخليه يأخذ خطوات نحو الخطوة الأولي ومنتظر تشاركونا بنقاط اخري شايفين إنها ممكن تفيد فى البدايات
اكتبوا لنا في التعليقات وما تنسوش اللايك والشير حتى تعم الفائدة
تحياتي
=================================================
احنا موجودين في كل المنصات عشان نوصلكم المعلومة اللي تفديكم في شغلكم او الابتسامة اللي بتساعدنا في مواجهة الظروف الصعبة او يارب يجعلنا سبب في انك تلاقي وظيفة
مستنينكم
***********************
***********************
0 تعليقات