دار حوار بينى وبين احد الأصدقاء وكان بيقول لى نفسي يبقي عندى جملة زى الجمل إللى بتتقال فى آخر الإعلانات دى ومش عارف أجيب الجملة دى إزاى عايز حاجه كده تكون رنانة وجميلة وتشد الإنتباه ويا سلام بقي لو كانت على نفس الوزن والقافية رديت قلت له مش عايزني أجيبلك DVD كمان 
طيب خلينا متفقين إن الجملة مش مجرد جملة بتتقال والسلام ولا هي حاجه كده بتتعمل في يوم وليلة وأساس إختيارها ملهوش أى علاقة لا بالوزن والقافية ولا إنها تكون جملة رنانة وخلاص.
الموضوع أكبر من كده بكتير لأن الجملة دي تعتبر من #خطوات_عمل_البراندج للبيزنس بتاعك وبيكون هدفها تعزيز الصورة الذهنية لشركتك وقطع وعد على نفسك بتنفيذ الجملة دى للعملاء وهنا أنت لازم تكون متأكد إنك تقدر توفي بالوعد ده للعملاء.
علشان كده قبل ما تفكر إزاى تجيب الجملة دى أنت محتاج تفكر فى قدرتك على تنفيذ فحوها وده طبعآ بيكون من خلال #المعرفة_الجيدة بعدة عوامل تقدر من خلالهم إنك تجيب الجملة دي 
إنك تكون عارف #إحتياجات_عملائك كويس وعارف إزاى منتجك أو خدمتك أو فكرتك بتقدر تلبي الإحتياجات دي.
إنك تكون عارف يعني إيه #سلوك_العميل وفاهم عملائك كويس بالإضافة إلي خلفياتهم الثقافية.
إنك تكون عارف #أهدافك_ورؤيتك_ورسالتك كويس أوى وعايز فعلا تحقق العناصر علي أرض الواقع مش مجرد كلام على ورق.ولو بصيت على النقاط السابقة هتلاقي نفسك عندك مصادر حقيقية وواقعية تقدر نجيب منها الجملة اللى أنت عايزها وتقدر تحصل من خلالها على جملة مناسبة وواقعية بما يتناسب مع ما تقدم من منتجات أو خدمات أو أفكار وبما يتناسب مع أهدافك ورؤيتك ورسالتك وميزتك التنافسية وطبعا لا نغفل مناسباتها للعملاء واحتياجاتهم وسلوكياتهم الشرائية.
وهنا بقي إسمح لى أقولك الجمله دي إسمها " SLOGAN " وعلشان نختارها لازم نأخد فى الإعتبار حاجات كتير ولكن.....المهم لما نختار السلوجن لابد إنه يكون مطبق على أرض الواقع فعليآ، ويكون يحمل رسالة واضحة ومحددة ومختصرة لخدمة العميل وخدمة البراند.
يعنى لما نقول مثلا صيدلية كذا...........نصلك أينما كنت
معنى كده إن السلوجن ده بيوضح أن #خدمة_التوصيل فى الصيدلية دي لأى مكان وكمان السلوجن ده بيعبر عن وجود إنتشار لهذه #العلامة_التجارية في جميع المحافظات وكان بيعبر عن وجود رقم موحد للطلب أون لاين...... وهكذا
علشان كده السلوجن مش مجرد جملة والسلام بالعكس الجملة دى لازم تكون بتعكس فعل حقيقي على ارض الواقع وإلا هتكون لها نتائج سلبية جدآ على المكان على المدي البعيد
لذلك الموضوع أكبر من أننا نلاقي جملة نقولها وخلاص لأن الموضوع مرتبط بتوصيل #رسالة_للعميل إللى هو يعتبر رأس المال الحقيقي للبيزنس، ولو الرسالة دي معندناش القدرة على تطبيقها أو الوفاء بها هتكون النتائج عكسية، وممكن نخسر سمعة المكان فى لحظه واحدة.
وخلي بالك أوعي تفتكر إن العميل ساذج، ومجرد ما يكتشف إنك بتقول إللى مش بتقدر توفي به أو تعمله سوف تواجه أحد المصيرين التاليين
المصير الأول :- إنك هتخسر العميل ده للأبد ومش هيتعامل معاك مرة تانية وخلاص وهيكتفي بخسارتك له.
المصير التانى :- أن العميل مش هيتعامل معاك تانى ومش هيتوقف عن نقل تجربته للأخرين والمحيطين به.
ومع الأسف ده سوف يؤثر عليك بالسلب، وهنا أنت لازم تكون عارف إن إنتشار الفيدباك السلبي بيكون أضعاف إنتشار الفيدباك الإيجابي وبيكون إنتشاره #إنتشار_فيروسي وده طبعآ نهايته معروفه إنك هتخسر البيزنس وسمعته فى لحظه واحدة.
ها لسه عايز تجيب جملة رنانة ولها وزن وقافية وخلاص...ولا نويت تختار جملة حقيقية ومطبقة على أرض الواقع ومختارة بعناية وفق معطيات حقيقية ومدروسة.
وفي الختام
لو أنت صاحب براند أو موظف فى مكان ما شاركنا على أى أساس تم إختيار السلوجن الخاص بكم وهل فعلا يتم تطبيقه على أرض الواقع ام لا ؟تحياتى
كريم محسن
https://www.facebook.com/KarimMohsenConsulting/
=================================================
احنا موجودين في كل المنصات عشان نوصلكم المعلومة اللي تفديكم في شغلكم او الابتسامة اللي بتساعدنا في مواجهة الظروف الصعبة او يارب يجعلنا سبب في انك تلاقي وظيفة
مستنينكم
***********************
***********************
){kind=link}
0 تعليقات