إزاى أقدر أتقن مجال البيع ويكون عندي القدرة على إتقان مهاراته وأقدر أحقق مبيعات عملاقة.
واحد من أكثر الأسئلة إللى دايمآ بتجيلي على الخاص وفي الغالب بيكون ردي على الشخص إللى بيسأل السؤال ده كالتالي:-
قبل ما تسألني إزاى تقدر تتقن مجال البيع.....لازم تكون عارف الأول ليه عايز تتقن مجال البيع، إيه هي أهدافك من العمل فى المجال ده.
خلينى أقولك بمنتهى الوضوح لو أنت داخل أى مجال ومش عارف ومحدد أنت داخل المجال ده ليه فى الغالب مش هيكون عندك القدرة إنك تبدع في هذا المجال ده ودخولك فيه مش هيكون إضافة لك ولا اضافة للمجال نفسه.
وده لسبب بسيط جدآ وهو عدم وضوح أهدافك وغياب رؤيتك وده هيكون سبب إنك مش هتقدر علي تكوين صورة ذهنية عن نفسك بعد دخولك المجال ده.
علشان كده أول خطوة لازم تعملها لو حابب تتقن مجال البيع إن يكون عندك أهداف واضحة من دخول مجال البيع.
لأن الأهداف دي هي إللى هتكون المحرك الأساسي لك إنك تتعلم أكتر وتفهم أكتر وتبحر وتغوص فى أعماق هذا المجال بدون كلل أو ملل.
ومن هنا هنلاقي أن وجود الأهداف فى حياتنا شئ مهم جدآ بيخلينا نقدر نحقق إنجازات مش ممكن نحققها فى ظل غياب الأهداف دي.
طيب لحد هنا اعتقد الموضوع واضح نجي بقي لإجابة السؤال إزاى تتقن مجال البيع وتحقق إنجازات كبيرة فيه ؟
الموضوع بمنتهي البساطة علشان تتقن مجال البيع أنت مش محتاج غير إنك تعرف " مقومات النجاح فى البيع " وهي عبارة عن هرم مكون من ثلاثة أضلاع يسمي ب هرم النجاح
🎯هرم النجاح هو عبارة عن مجموعة من العوامل إللى لازم تعرفها وتتبعها، لأن من خلال هذه العوامل هتقدر تحقق إنجازات ونجاحات كبيرة فى حياتك بشكل عام وفى مجال البيع بشكل خاص.
وكمان الهرم ده يعتبر بمثابة الأساس إللى ممكن تبني عليه أى نجاح فى أى مجال بشكل عام.
طيب ايه هما بقي الثلاثة أضلاع إللى بيتكون منهم هرم النجاح أو مقومات النجاح فى البيع
1️⃣المعلومات والمعارف Knowledge & information :-
تعتبر المعلومات والمعارف من اساسيات نجاحك فى مجال البيع لانها من اهم اسلحة رجال البيع المحترفين علشان كده لازم تتوفر لديك المعلومات والمعارف التى تخص مجال عملك وتبحث عن أحدث المعلومات والمعارف فى هذا المجال واحذر المعلومات المنقولة أو المغلوطة والمعارف والمعلومات دي ممكن تحصل عليها من خلال القراءة والإطلاع فى نفس المجال، حضور الندوات والمؤتمرات المتعلقة بنفس المجال، مجالسة الأشخاص الأكثر نجاحآ فى هذا المجال والتحدث معهم........ الخ
2️⃣المهارات Skills:-
أى عمل فى الحياة يتطلب مجموعة من المهارات إللى من خلالها يتم إنجاز هذا العمل بكفاءة وفعالية, علشان كده لو عايز تنجح فى مجال البيع لازم تتقن وتمارس المهارات المتعلقة بالبيع وتتدرب جيدآ عليها علشان تقدر تكتسبها, ومع الممارسة والتطبيق العملى للمهارات دى هتقدر توصل إلى مرحلة " Best practices " أفضل طريقة لتأدية العمل وهنا تتحول من موظف عادى إلى موظف ماهر متمكن من عملك.
المهارات نقدر أننا نتعرف عليها من خلال التدريب العملي على رأس العمل من أشخاص تتقن المهارات دى وإنك تبدأ تمارس وتقييم أدائك بإستمرار وقبل ما تحكم على شئ واجب عليك تجربته اولآ علشان يكون حكمك مبني على نتائج حقيقية وليس مبني على اعتقاد عندك ممكن يكون اعتقاد خاطئ.
ومن أهم مهارات البيع ( مهارات الإتصال والتواصل مع الآخرين - مهارات خدمة العملاء - مهارات تحليل الأرقام - مهارات التخطيط والمتابعة - مهارات العرض والتقديم - مهارات التعامل مع المشكلات - مهارات إدارة الوقت.... الخ )
3️⃣السلوكيات attitude:-
لكل فعل ردة فعل والسلوك أو الموقف السلوكي هو عبارة عن طريقة الإستجابة للمؤثرات سواء كانت هذه المؤثرات خارجية أو داخلية ويمكن أن نصفها بردة الفعل التى تتبعها فى موقف معين وللأسف هذه السلوكيات هي التى تؤثر بشكل مباشر فى عملية نجاحنا أو إخفاقنا فى إتقان مجال البيع لأنها تعتبر هي قاعدة الهرم إللى بتبنى عليها باقي أضلاع هرم النجاح، وذلك لأن رجل البيع الناجح هو الذي يستطيع التحكم فى ردود أفعاله وبيكون عارف كويس أوي إن 90% من نجاحه فى مجال البيع بيعتمد على نظرته المتفائلة وعلى ردود أفعاله تجاه الأحداث والأشخاص إللى بتمر عليه وعلى طريقة تفكيره.
وبكده أكون قدرت إنى أوضح لكم إزاى تتقنوا مجال البيع بشكل خاص و إزاى تتقنوا أى مجال بشكل عام من خلال هرم النجاح
وهنا يبقي السؤال
من واقع تجربتك إلى أى مدي تري أن هرم النجاح يساهم فى نجاحنا في مجال البيع ؟
شاركونا إجاباتكم فى التعليقات حتى تعم الفائدة
=================================================
احنا موجودين في كل المنصات عشان نوصلكم المعلومة اللي تفديكم في شغلكم او الابتسامة اللي بتساعدنا في مواجهة الظروف الصعبة او يارب يجعلنا سبب في انك تلاقي وظيفة
مستنينكم
***********************
***********************
0 تعليقات