فن وضع الأهداف البيعية (التارجت)

 


من النقاط المهمة جدآ إللى ممكن من خلالها تقدر إنك تحصل على أكبر إستفادة ممكنه من #رجال_البيع وتخليهم يستمروا فى تحقيق الأهداف المطلوبة .

هي طريقتك فى وضع الأهداف مع الأسف فى ناس كتير جدآ بتعتمد على ما يسمي ب #تعليق_الجذرة على اعتقاد منهم أن بكده رجال البيع هيجروا أكتر علشان يحققوا الهدف.

ده مع الأسف الشديد كفيل إنه يصيب رجال البيع بالإحباط واليأس خاصة لو حسوا أن الهدف ده محطوط علشان محدش فيهم ياخد عموله أو يحقق الهدف. 

#وضع_الأهداف_فن مش مجرد رقم بتحلم به وخلاص 

وعلشان تقدر تحصل على أقصي مجهود من رجال البيع لازم تحط لهم #هدف_ذكي مش هدف تعجيزي وكأنك بتطلع لهم لسانك وبتقول لهم ادي دقني لو شوفتم العمولة.

فى اعتبارات كتير جدآ علينا أن نهتم بها عند وضع الأهداف لرجال البيع أهمها :- 

1️⃣ مراجعة التاريخ البيعي لنفس المنطقة او لنفس الفروع او لنفس العملاء وتشوف حجم المبيعات لهذا التاريخ وتقارنه بالرقم المطلوب تحقيقه والنمو المطلوب.

2️⃣مراجعة المنتجات المباعة سابقآ لنفس الفترة المطلوب وضع هدف لها ومدى توفر هذه المنتجات وتأثيرها على وضع الهدف.

3️⃣مراجعة قوة الأيام لنفس الفترة المطلوب وضع الهدف لها وهل هذه الأيام تعتبر من الأيام ذات القوة الشرائية العالية أو متوقع حدوث طفرة فى حجم الطلب زى مثلا أيام المواسم والأعياد بالنسبة لبعض الصناعات والمجالات. 

4️⃣ مراجعة وتقييم حجم الزيادة فى عدد العملاء وحجم الزيادة فى متوسط فاتورة العميل الواحد وهل هذه الزيادة تؤثر فى حجم الطلب وما هي نسبة التأثير المتوقعة.

5️⃣ مراجعة وتقييم المنتجات والخدمات المقدمة هل تضيف شئ جديد للعملاء أو بالإمكان استهداف عملاء آخرين بإستخدامات اخري لهذه المنتجات زى ما حصل فى أزمة كورونا مع معقمات اليد والكحول وملابس التعقيم ..... الخ.

دول أهم خمس عوامل لازم ناخدهم بعين الاعتبار عند وضع هدف بيعي لرجال البيع مع مراعاة أن الهدف ده لابد أن يكون واقعي وقابل للتحقيق ومحدد بزمن لبلوغه ويمكن قياسه وطموح بلا مبالغة.

ده طبعا لو حابب إنك تكسب ورجال البيع يكسبوا والدنيا تمشي وتحقق أهدافك وأنت رافع راسك وتفتخر بوجود فريق بيع قوى عندك 

إنما لو بتفكر بالطريقة القديمة إنك تعلق لهم الجذرة مع الأسف خساراتك على المدي البعيد هتكون أكبر بكتير من أى نتائج حققتها بإتباع هذا الأسلوب الغير مناسب مع رجال البيع ودايمآ بيجيب نتائج عكسية.

لأنك بكده هتشكل عندهم #عادات_وانطباعات_سلبية حتمآ ولابد سوف تؤثر على أدائهم فى العمل وعلى نتائجهم فى تحقيق الأهداف 

وهنا هتكون تكلفة إصلاح ما أفسدته بطريقة وضعك للأهداف بشكل غلط أكبر بكتير من العمولات إللى كنت هتصرفها لهم لو وضعت الأهداف بشكل صحيح وأقرب للصواب .

علشان كده مش مطلوب منك غير إنك تكون واقعي ومحدد عند وضعك للأهداف البيعية وتراعي كل الظروف والمعطيات إللى ممكن تؤثر سلبآ أو إيجابا فى تحقيق هذه الأهداف وتحط النمو الواقعي إللى يخلي رجال البيع يجروا علشان فى بصيص امل فى نهاية الطريق مش يصابوا بالإحباط من بداية الطريق وبعد كده ترجع تسأل هما ليه مش بيحققوا التارجت 🤷‍♂️

مهم جدآ تعرف أن تعليق الجذرة ده يتعمل مع الأرانب وما أعتقدش إنك أرنب ولا هما أرانب 😂

تحياتى 
كريم محسن

=================================================

احنا موجودين في كل المنصات عشان نوصلكم المعلومة اللي تفديكم في شغلكم او الابتسامة اللي بتساعدنا في مواجهة الظروف الصعبة او يارب يجعلنا سبب في انك تلاقي وظيفة
مستنينكم



***********************


***********************

إرسال تعليق

0 تعليقات