التنبؤ بالمبيعات " " Sales Forecasting

 

"

 التنبؤ بالمبيعات " 

                                 " Sales Forecasting "

في يوم من الأيام دار يبنى وبين أحد الأصدقاء نقاش حول كيفية وضعه لهدف شهري لفريق البيع الموجود فى شركته .

وقتها قالى انه عايز يحط هدف أكبر من مبيعات الشهر الماضي بنسبة لا تقل عن 45% وبيقولي ايه رأيك .

قلت له قبل ما اقولك على رأيي خلينى أسألك سؤال علشان يكون رأيي واضح ومحدد ، انت على أي أساس قررت تحط النسبة دى زيادة على مبيعات الشهر الماضي وتخلي الرقم ده هو هدف الشهر الجديد. 

وهنا كانت الصدمه الكبيرة لأنه رد قال الشهر إللى فات كان فى حركة كبيرة فى البيع وانا حاسس ان الشهر ده هيكون أفضل، هنا انا قاطعته فى الكلام وقلت له بصراحه الموضوع مش بيدار بالشكل ده لان فى حاجه اسمها " sales Forcasting " أو التنبؤ بالمبيعات العملية دى بتقدر من خلالها انك تحط توقع للمبيعات فى المستقبل خلال فترة زمنية محددة وفق معطيات واضحه وضوح الشمس .

ولو انت ناوى تحط الرقم إللى بتقول عليه بالإحساس كده يؤسفني انى اقولك مش هتوصل حتى 60% من الرقم إللى ناوى تحطه لأنه مش مبني على رؤية واضحه وتنبؤ وفق معطيات واضحه ومحددة خاصة ان الشهر إللى جاى شهر فبراير ‼🤔🤔

رد قالى وايه المشكله شهر فبراير ولا يناير هنا قلت له لا مشكله طبعا الشهر ده 28 يوم يعنى ناقص عن الشهر إللى قابله 3 أيام يعنى عندك أيام مفقود بيعها فى الشهر الجديد.

هنا قالي اه تصدق مكنتش واخد بالى طيب اعمل ازاى التنبؤ بالمبيعات علشان اضمن انى احط رقم طموح وفى نفس الوقت انا اكسب وفريق البيع يكسب ويحقق هدفه .

علشان تعمل Sales Forecasting سليم لازم يكون عندك مجموعة من المعطيات المهمه جدا تأخدها بعين الاعتبار زى :- 

1️⃣ توفر المنتجات بالأخص المنتجات الأكثر مبيعا عندك .

2️⃣ مراجعة التاريخ البيعي لنفس الشهر العام الماضي .

3️⃣ جمع الآراء من فريق المبيعات عندك بالأخص الاكفاء منهم. 

4️⃣ مراجعة العقود والاتفاقيات بينك وبين العملاء وأوامر التوريد ومواعيدها .

5️⃣ مراجعة مسحوبات العملاء وقياس مدى قابلية العميل على سحب منتجاتك .

6️⃣ التأكد من المناسبات الخاصة أو الاجازات إللى ممكن تؤثر فى حركة البيع عندك .

وغيرها كثير من المعطيات إللى من خلالها تقدر تحدد ايه هو الهدف المناسب إللى تحطه لفريق البيع عندك .

طبعا المعطيات دى بتتغير بحسب كل نشاط وطبيعته علشان كده يا صديقي العزيز موضوع انك تحط هدف أو تتنبأ بالمبيعات ده مش حاجه سهله زى ما كل الناس بتفتكر.

الموضوع محتاج دراسه وتحليل ومتابعة لكل المتغيرات والعوامل إللى ممكن تؤثر بشكل مباشر فى تحقيق أهدافك البيعية .

علشان كده انت لازم تقعد مع نفسك وتجمع كل المعلومات دى ووقتها اقدر اقولك رأيي بمنتهى الوضوح وساعتها هنوصل انا وانت لوضع هدف " Smart " لفريق البيع وانت تكسب وهما يكسبوا.

وخليك عارف كويس اوى أن مفيش حاجه ممكن تحبط فريق البيع عندك أو تقلل من عزيمتهم غير لما يحسوا أنهم بيجروا وراء سراب مش ممكن يتحقق ووقتها خسارتك هتكون أكبر بكتير من خسارتهم لأنك هتكون فقدت مبيعات كتير اوى بسبب الإحباط إللى هما فيه.

ده غير انك علشان تظبط الحالة دى محتاج تصرف كتير اوى وقت وجهد وفلوس وبكده تكون خسرت المبيعات وخسرت الفريق إللى بيجيبلك المبيعات دى .

ها ايه رأيك تحط 45% زيادة عن مبيعات الشهر إللى فات ولا ايه 😂

#كريم_محسن K.M

=================================================

احنا موجودين في كل المنصات عشان نوصلكم المعلومة اللي تفديكم في شغلكم او الابتسامة اللي بتساعدنا في مواجهة الظروف الصعبة او يارب يجعلنا سبب في انك تلاقي وظيفة

مستنينكم

قناة التليجرام Telegram

قناة التيك توك TikTok

تابعونا على اليوتيوب

جروب الفيس بوك

تابعونا على الأنستجرام

تابعونا على الفيس بوك

تابعونا على الفيس بوك البديل

***********************

***********************