كنت بتناقش مع أحد الأصدقاء إللى شغالين فى #مجال_البيع كان بيقولى أنا بعرف العميل من أول نظرة إذا كان عميل هيشتري ولا جاى يتفرج وبناء على معرفتي به بقرر إذا كنت أتعب معاه واعطي له من وقتي ومجهودي ولا اطفشه 
.
.وبعد سمعت كلمه اطفشه دي مقدرش ما اتكلمش وقلت له معلش ثوانى كده هو أنت بتشم على ظهر إيديك مثلآ ولا أنت مخاوي اللهم احفظنا 
ولا إيه بالظبط .
ولا إيه بالظبط .معلش يا صديقي العزيز كلامك كله غلط مفيش حاجه إسمها أنا بعرف العميل من أول نظرة حتى لو كنت #خبير_مبيعات " الكلام ده مش صح ابدآ ومفيش حاجه إسمها الجواب بيبان من عنوانه .
العميل بنى آدم زيه زيك بيجي عليه وقت ممكن مايكونش مهتم بمظهره وبيجى عليه وقت ممكن تلاقيه بيتكلم بطريقه فيها نرفزه أو أسلوبه غريب على حسب الحالة المزاجية له أو التوقيت الزمني إللى جاي لك فيه أو الموقف.
يعنى مينفعش تحكم عليه من الظاهر إلا لما تجري معاه حوار مبني على علم ومعرفه مش مجرد تكهنات ليس لها علاقة بالواقع.
ومع الأسف هذه #الإعتقادات_الخطأ فى كتير من #رجال_البيع عندهم إيمان تام بها، وده ممكن يكون سبب رئيسي فى عدم تحقيق أهدافهم لاعتقادتهم الغلط عن العملاء أو اعتقادهم أن " الجواب بيبان من عنوانه " .
خلينى أقولك على قصه كده نوضح بها الموضوع ده علشان نفهمه أكتر ونوعي الناس به .
زمان في عام تقريبآ 2002 كنت شغال فى توكيل كبير من توكيلات حقائب السفر إللى شنطة السفر عندهم وقتها كانت تسوي كتير اوى
وكان عندى نفس اعتقادك ده أن العميل بيبان من أول نظره وكنت مؤمن أن #تقييم_العميل الكويس إللى معاه فلوس بالنسبة لى في الوقت ده لما يكون حذائه نظيف ومتلمع.
وبما إنى كنت شغال فى مكان يصنف من #الأماكن_الخمس_نجوم فكنت مؤمن جدآ بالإعتقاد ده، لأن طبيعة المكان بتحكم أن مش أى حد يدخله ويشتري منه.
وفجأة دخل عليا عميل لابس جلبية وشبشب
وأول ما شفت العميل بصيت على حذائه ووقتها مع الأسف ما رضيت اقوم من على الكرسي ولا استقبلت العميل زى ما بقابل العملاء.
ولقيت العميل بيقولي عايز أشوف الشنطه دي !! بينى وبين نفسي قلت يا واد قوله سعرها علشان يعرف إنها غالية عليه ويمشي وما يتعبكش معاه .
.رديت قلت له سعرها 1575 ج فجأة لقيت العميل بيقولي بإستغراب شديد أنا ما سألتكش على السعر أنا بقولك عايز أشوفها.
بصراحه حسيت بالكسوف وقمت من على الكرسي ببطئ شديد رجل وراء ورجل قدام وجبت الشنطة علشان يشوفها .
ولقيته بيقولى أنا عايز منها 4 شنط 2 لون اسود و 2 لون أزرق، وهنا كانت الصدمة إللى هدمت الإعتقاد الغلط إللى كان عندي وفجأة معاملتى للعميل تغيرت 360 درجة لدرجة إن العميل حس بفرق المعاملة.
وقالي أوعي يغرك مظهري وطلع لى الكارت بتاعه وعرفني بنفسه أنه اسمه الحاج.........مقاول كبير وصاحب شركة مقاولات وواخد الشنط دى هدايا لعملاء عنده
ومن وقتها يا صاحبي وأنا لو شفت عميل من غير هدوم هحترمه واقدره وهخدمه زيه زى أى عميل، لأن العميل ده هو السبب بعد ربنا فى تحقيق أهدافنا وقبض رواتبنا.
ومن بعدها وأنا عندى يقين أن عمر الجواب ما بيبان من عنوانه إلا لما تفتحه وتقرأ محتواه زى العميل بالظبط مش هتعرف إن العميل هيشتري ولا لاء إلا لما تتكلم معاه وتتعرف على احتياجاته علشان تقدر تخدمه صح.
علشان كده أكبر غلط ممكن يوقع فيه كتير من رجال البيع هي اعتقاداتهم بأنهم بيعرفوا العميل من أول نظره وبيكونوا إنطباع عن العميل قد يكون إنطباع غلط لأنه مش مبنى على حقائق.
علشان كده أوعي تكون إنطباع عن أى عميل لمجرد مظهره مش مناسب أو إنك سمعت من حد تانى إنه عميل متعب إلا لما تتعامل معاه مرة واتنين لان بمنتهي البساطة انطباعاتنا عن العملاء لابد وأن تكون دائمآ إيجابية، ولكن إنطباع العملاء عن رجال البيع تتطلب مجهود كبير من رجال البيع لتكوين إنطباع طيب وإيجابي.
وبكده نكون عرفنا أن فى إعتقادات غلط ممكن تكون سبب فى عدم وصولنا لأهدافنا وبتكون سبب فى ضياع الكثير من #الفرص_البيعية وخسارة الكثير من العملاء.
علشان كده أوعي تكون انطباع عن أى عميل إلا لما تتكلم معاه وتتعرف على إحتياجاته بوضوح علشان الجواب عمره ما بيبان من عنوانه كما يزعم البعض من #رجال_البيع
وفي الختام لو أنت مريت بمواقف زى دى قبل كده أو فى إعتقاد غلط وتم تصحيحه عندك اكتبوا لينا فى التعليقات لتعم الفائدة
تحياتي
كريم_محسن K.M
=================================================
احنا موجودين في كل المنصات عشان نوصلكم المعلومة اللي تفديكم في شغلكم او الابتسامة اللي بتساعدنا في مواجهة الظروف الصعبة او يارب يجعلنا سبب في انك تلاقي وظيفة
مستنينكم
***********************
***********************
0 تعليقات