خلينى فى البداية أوضح حاجه مهمه مش معنى أن المنافس بيبيع بأسعار أقل منك قد تصل فى بعض الأحيان إلى أسعار أقل من التكلفة أن المنافس ده بيخسر ومش معنى أن فى منافس بيحرق السعر أنه غشيم أو قاصد أنه يضيع فلوسه ويرميها فى الأرض.
ولكن أحيانا المنافسين بيكون لهم أهداف بيقدروا بمجرد ما يوصلوا لها يعوضوا فرق السعر إللى بيضحوا به فى بعض المنتجات والخدمات إللى بيقدموها خاصة لو المنتجات دى المنافسة فيها شرسة جدآ .
وده بالظبط إللى حصل مع أحد شركات الهايبر ماركت فى أحد الدول العربية لما قرروا أنهم يدخلوا السوق الخليجى وبدأو فى عرض البعض من المنتجات المتداولة عند المنافسين الآخرين بأسعار أقل وقد تصل فى بعض الاحيان إلى أسعار أقل من التكلفة.
وده اللى خلى الشركات المنافسة أنها تروح للمورد الرئيسي ويشتكوا من أسلوب التعامل ويستفسروا منه ازاى ممكن يكون بيدى الشركة الجديدة دى بأسعار أقل منهم على الرغم من أنهم الأقدم فى السوق.
ولأن المورد هو الوحيد إللى بيوزع المنتج وهو المصنع له كان رده صارم وواضح أنه إستحالة يدى حد أسعار أقل من الأسعار المعتمدة عنده ومؤكد الشركة الجديدة دى بتبيع بالخسارة أو عندهم منتجات مقلدة وجودتها ضعيفة.
وهنا بدأت الشركات القديمه أنها تبحث وتدور عن السر إللى يخلى شركة لسه بنت امبارح زى ما بيقولوا تبيع بسعر اقل منهم أو بالخسارة في بعض الأحيان.
وهنا كانت البداية الحقيقية للبحث وراء الشركة الجديدة وبدأت الشركات فى الإستعانة بمتخصصين فى التسويق والمبيعات علشان يعرفوا إستراتيجية المنافس الجديد ويتعرفوا أكثر عن المنافس ده وعن المنتجات والخدمات إللى بيقدمها.
ومن هنا عرفوا أن فى حاجه إسمها إستراتيجيات التسعير ومن ضمن الإستراتيجيات دي إستراتيجية " اختراق السوق والتغلغل السريع "
واللى بيكون الهدف الرئيسي للشركات اللى بتستخدم الإستراتيجية دي هو جذب أكبر عدد ممكن من عملاء المنافسين .
وعلشان يقدروا يجذبوا العملاء مش بيكون أمامهم خيار غير أنهم يقللوا الأسعار بشكل كبير جدآ خاصة على المنتجات الأساسية والاستراتيجية
وده بيكون بهدف أنهم يجذبوا أكبر عدد ممكن من العملاء عند المنافسين ليهم ويقدروا يعرضوا منتجات أخري عليهم وكمان يعرفوهم عن أنفسهم وعن شركتهم الجديدة ومستوى الخدمة إللى بيقدمونه .
وبكده يكونوا تمكنوا من اختراق السوق وتمكنوا إنهم يبنوا اساس للوقوف عليه ويخلقوا لنفسهم مساحة مع المنافسين الآخرين.
طبعا الإستراتيجية دي ممكن فى البداية تكون سبب فى خسارة جزء من الأرباح ولكن على المدى البعيد الشركات الجديدة بتقدر أنها تعمل تنوع فى المنتجات بتاعتها وتقدر تبرز نفسها وسط المنافسين وبعد كده بيقدروا يكونوا أكثر مرونه فى تسعير المنتجات ورفع السعر بشكل تدريجي .
علشان كده لازم نعرف أكثر عن إستراتيجيات التسعير ونعرف أن مفيش حاجه بتتعمل فى التسعر بالذات مش بيكون لها هدف خاصة لو المنافس ليك فاهم يعنى إيه تسعير كويس أوي 👌
أتمنى أكون قدرت أوضح لكم يعنى إيه إستراتيجية " اختراق السوق " وإيه الهدف منها وهنا يبقي السؤال المطروح لحضراتكم ❤
✍ما هي أفضل طريقة للتعامل مع المنافس الذي يطبق هذه الإستراتيجية ؟؟
بإنتظار إبداعاتكم فى التعليقات 🌷
وأتمنى لكم التوفيق والنجاح
تحياتى
كريم محسن
***********************
***********************
0 تعليقات