زمان واحنا صغيرين كنا دائمآ بنحلم باليوم إللى نلاقي فيه شنطة المليون، ومع مرور الوقت عرفنا أن الحلم ده هو حلم ال 100 مليون وهما صغيرين.
في عام ٢٠٠٥ دار نقاش بيني وبين أحد الأصدقاء الأعزاء على قلبي، وفي وسط الكلام
رديت قلت له هتعمل بهم إيه إن شاءالله
قال لى نحط نص مليون فى البنك والنص مليون نعمل بهم أى مشروع وكده تبقى اتعشت وبقت الحياة فله شمعة منورة.
تفاعلت مع الفكرة إللى طرحها صديقي، وجبت الآلة الحاسبة و قعدنا نحسبها.
قلت له مثلاً لو الواحد وفر 5k فى الشهر يعنى فى السنة 60k يعنى الواحد عايز حوالى 16 سنه علشان يعمل المليون 
أو أنه يفضل مستني الحلم يتحقق بقي ويلاقي الشنطة إللى فيها #المليون
بمجرد ما انتهينا من الحسبة البسيطة دي فهمت معني فرق معايا كتير جدآ في حياتي وتعلمت أشياء وضحت ليا حاجه مهمه جدآ وهي إننا مع الأسف طول ما احنا دائماً نفكر فى الرقم الكبير عمرنا ما نقدر نوصل له، وده بسبب بسيط جدآ وهو #الإحباط_من_بعد_المسافات.
لأننا بمنتهى البساطة انجذابنا للأشياء سهلة الوصول بيكون أكثر و بنتحرك خطوات حقيقية تجاه هذه الأشياء السهلة أكتر من الاشياء الصعبة أو شبه المستحيلة من وجهة نظرنا.
وده لأننا نفكر فى تحقيقها بطرق تقليدية عقيمة تبان فى حسبتها سهلة لكن فى تنفيذها مفيش أصعب منها.
وده الفرق دائماً بين الشخص الذي يفكر خارج الصندوق والشخص الذي دخل جوه الصندوق ومش بيحاول يخرج منه ولا عنده استعداد للخروج لانه اعتاد علي طريقة التفكير دي و معندوش استعداد أنه يجرب طرق تفكير جديدة.
ولو فكرنا فى الموضوع بطريقة مختلفة هنلاقي أننا ممكن نوصل للرقم ده فى زمن أقل كتير لو غيرنا #طريقة_تفكيرنا في كيفية الوصول للهدف ده.
علشان كده لازم نعرف أن مفيش حاجه فى الدنيا ممكن #تقتل_طموحنا و تصيبنا بالإحباط إلا إننا نفكر فى الحصول على شئ معين أو تحقيق هدف معين #بطرق_تقليدية تخلينا نحيد عن هدفنا و تشعرنا بالعجز فى تحقيقه.
لأننا دائماً بنبص لنصف الكوب الفارغ إللى يخلينا مش عارفين نستغل كل مواردنا المتاحه أحسن استغلال .
وهنا يبقي السؤال المهم جدآ اللي إجابته اضمن لك أنها هتفرق معاك كتير في تحقيق أي هدف في حياتك وهو #ازاى_نوصل_لأهدافنا 
حدد اهدافك بعناية جدا و اكتبها على ورق. رتب الأهداف دى حسب الأولوية. إبدأ بالهدف الأول من حيث الأولوية دون النظر على باقي الأهداف لا تشتت نفسك فى تحقيق أكثر من هدف وبطل تفتح أكتر من باب علي نفسك وانت لسه محدود الإمكانيات والموارد. حدد إمكانياتك وقدراتك والموارد المتاحه عندك و افتكر أن الموارد دى مش شرط تكون فلوس بس ممكن تكون وقت أو فلوس أو معرفة أو علم معين المهم إنك تعرف إزاى تستغل الموارد دي صح. قسم هدفك الكبير إلى أهداف صغيرة و افتكر أن أى هدف كبير علشان توصل له لازم تبدأ بخطوات صغيرة وتحقق مجموعة من الأهداف الصغيرة إللى توصلك لهدفك الكبير. حدد العقبات إللى ممكن تواجهك وأنت فى طريقك لهدفك وحط لكل عقبة ممكن تواجهك طرق لتتخطاها #اسأل_نفسك_ماذا_لو 
حدد الأشخاص إللى ممكن يساعدوا فى بلوغك لهدفك و ازاى تخليهم يساعدوا فى تحقيق هدفك. تصور وتخيل إنك وصلت لهدفك، ودائماً ابدأ والنهاية فى ذهنك وده سوف يخلق جواك الدافع و الحافز على الإستمرار. كافئ نفسك كل ما تحقق خطوة تجاه هدفك افتكر إن التحفيز هو الوقود إللى بيدفعنا دائماً للأمام وأولي الناس بتحفيزك هو إنك تحفز نفسك وتؤمن بقدراتك و إمكانياتك وتحسن الظن بالله. ولو عايز توصل المليون لازم تعرف إزاى توصل إلى 50k ولو وصلت 50k هتقدر توصل لأبعد من كده
#كسر_المليون إلى أرقام صغيرة فى وقت أقل ده هيخليك تعرف إزاى تستغل ما بين إيديك صح ويخليك تعرف إزاى تنميه وتطوره و تكبره خطوة خطوة.
و افتكر أن الإستثمار الحقيقي مش إنك تبدأ بمبلغ كبير يا إما بلاش 
#الإستثمار_الحقيقي اللى يوصلك للمبلغ الكبير إنك تبدأ بمبلغ صغير وتعرف إزاى تديره صح.
#حلم_العثور على شنطة المليون مش ممكن يتحقق إلا لما تفوق من الحلم و تصحي وتبدأ تاخد خطوات لتحقيق الحلم حتى لو البدايات بسيطة #سهلها_على_نفسك_ما_تصعبهاش
لو استفدت من المقال ما تنساش تعمل شير حتي تعم الفائدة واكتب لي في التعليقات الي أى مدي تري أن الخطوات دي ممكن تفرق معاك ؟ 
تحياتي
=================================================
احنا موجودين في كل المنصات عشان نوصلكم المعلومة اللي تفديكم في شغلكم او الابتسامة اللي بتساعدنا في مواجهة الظروف الصعبة او يارب يجعلنا سبب في انك تلاقي وظيفة
مستنينكم
***********************
***********************
0 تعليقات